ახლა დუმილი ან ნებისმიერი ფორმით ამ რეჟიმთან შემგუებლობა დანაშაულია! დადგა დრო, თავისი სახელი დავრქვათ ყველაფერს - მოძალადე რეჟიმს, მასთან მოთანამშრომლე თუ მდუმარე ადამიანებს და ყველა გამოვიდეთ, ვიბრძოლოთ საქართველოს ამ დანაშაულებრივი, დამღუპველი პუტინისტური რეჟიმისგან საბოლოოდ გასათავისუფლებლად! - ამის შესახებ თბილისის პოლიტიკური სწავლების სკოლის მიერ გავრცელებულ განცხადებაშია აღნიშნული.

განცხადების თანახმად, „დანაშაულებრივი რეჟიმის ბოროტი განზრახვით ქვეყანა და კარგავს ნორმალური მომავლის ბოლო შანსს”.

„ჩვენ, თბილისის პოლიტიკური სწავლების სკოლელები, 25 წელი ერთგულად, უანგაროდ, მთელი შეგნებით ვემსახურებით საქართველოს სამართლებრივ, ევროპულ სახელმწიფოდ ჩამოყალიბების უზენაეს იდეას, კეთილგონიერ პიროვნებად, სახელმწიფოებრივად, დემოკრატიულად მოაზროვნე მოქალაქედ ჩამოყალიბების გზას!

ყოველთვის, ყველა საბედისწერო მომენტში, სკოლელების უმრავლესობა ვიდექით და ვდგავართ ამ გაუხუნარი ფასეულობების სადარაჯოზე. სიტყვით და საქმით აღვასრულებთ ჩვენს უმთავრეს მოქალაქეობრივ ვალს!

ახლა, როცა ამ დანაშაულებრივი რეჟიმის ბოროტი განზრახვით ქვეყანა და თითოეული ჩვენგანი კარგავს ნორმალური მომავლის ბოლო შანსს, როცა სხვებთან ერთად არაერთი სკოლელია უკანონოდ დაკავებული და დასახიჩრებული აქციებზე, ყველა ვალდებული ვართ, ვთქვათ სიმართლე და გავემიჯნოთ ყოველგვარ ნახევარსიმართლეს!

მამაც მოსამართლეთა, სახელმწიფო მოხელეთა, ჟურნალისტთა და აქტივისტთა შორის წინა ხაზზე დგანან ჩვენი საამაყო, სამაგალითო სკოლელები! ახლა დუმილი ან ნებისმიერი ფორმით ამ რეჟიმთან შემგუებლობა დანაშაულია! დადგა დრო, თავისი სახელი დავრქვათ ყველაფერს - მოძალადე რეჟიმს, მასთან მოთანამშრომლე თუ მდუმარე ადამიანებს და, რაც მთავარია, ყველა გამოვიდეთ და ვიბრძოლოთ საქართველოს ამ დანაშაულებრივი, დამღუპველი პუტინისტური რეჟიმისგან საბოლოოდ გასათავისუფლებლად!“ - აღნიშნულია განცხადებაში.