ფოთში, საპროტესტო აქცია მიმდინარეობს. მოქალაქეები საკათედრო ტაძართან შეიკრიბნენ.

ისინი „ქართული ოცნების“ მიერ ევროკავშირთან მოლაპარაკებების გახსნის პროცესის 2028 წლამდე შეჩერებას აპროტესტებენ.

„ვაპროტესტებთ დღევანდელ მოვლენებს საქართველოში. ვაპროტესტებთ გარუსებას, რასაც ჩვენი მთავრობა აპირებს. ბუნებრივია, არასოდეს შევეგუებით”, - აცხადებენ ისინი.

ამ წუთებში დემონსტრანტებმა გზა გადაკეტეს და ფეხით მსვლელობას გეგმავენ.

დემონსტრანტები რამდენიმე წუთით მერიის შენობასთან გაჩერდნენ და საჯარო მოხელეებს“ გამოფხიზლებისკენ“ მოუწოდეს. მოგვიანებით კი, "ქართული ოცნების" ოფისთან გადაინაცვლეს, სადაც სკანდირებდნენ: "მონებო".

"თქვენ ხართ სამარცხვინოები, თქვენ მოგვპარეთ ხმები, გააყალბეთ არჩევნები, რაც არ შეგრჩებათ. ეს ქვეყანა არ არის ბიძინა ივანიშვილს და მოვუწოდებთ ფოთელებს, გაიღვიძონ და შემოგვიერთდნენ. ჩვენი მიზანია ოლიგარქიული რეჟიმის დამარცხება", - აცხადებენ აქციის მონაწილეები.