„ძლიერი საქართველოს“ ერთ-ერთი ლიდერის, ალეკო ელისაშვილის განცხადებით, მან ევროსაბჭოს გენერალურ მდივანს, ალენ ბერსეს, შეხვედრისას, საკუთარი დაკავებასთან ერთად, აქციაზე დაკავებულ სხვა პირებთან დაკავშირებითაც მიაწოდა ინფორმაცია.

ამის შესახებ მან ჟურნალისტებს განუცხადა.

„ვესაუბრე ჩემს ამბავზე, როგორ დაიწყო ჩემი დაკავება, ცემა-ტყეპა, წაყვანა და მერე რა ხდებოდა. ასევე ჩემს თავზე მეტი ვილაპარაკე დანარჩენ პოლიტპატიმრებზე. ავუხსენი, რომ პოლიტიკოსი ვარ, ჩემი სახელი და გვარი ცნობილია, მაგრამ ჩვეულებრივი ადამიანები გაცილებით სასტიკად ნაცემები და ნაწამები არიან. მათ სისხლის სამართლის ბრალი აქვთ წარდგენილი. ასეთი 40 ადამიანია. ძირითადად, ველაპარაკებოდი, რომ ამ ხალხს უნდა დავეხმაროთ-მეთქი. ჩემი საქმეც არაა დამთავრებული. 1.5 თვით ვარ გამოსული, შეიძლება 3 წლით შემატრიალონ უკან. ჩემი თავი ჯანდაბას, სხვები ისეთ დღეში არიან, ისეთი მძიმე ბრალი აქვთ, 9, 15- წლიანი. იმ ხალხს უნდა შველა. ძალიან კარგად არიან ინფორმირებულები და ძალიან გულისყურით მისმენდნენ. თქვეს, რომ მათ რაც შეუძლიათ და არ შეუძლიათ ყველაფერს გააკეთებენ, რომ ეს ადამიანები დაიხსნან პოლიტიკური ტყვეობიდან.

„ქართულ ოცნებაში“ ბევრს ვყავარ ყელში გაჩხერილი. უნდათ პოლიციელებისა და მხეცების ხელით გამისწორონ ანგარიში და შემაშინონ, ოღონდ არც მე და არც არავის არ შეგვშინებია. ეს არის კონტრპროდუქტიული, რასაც შვრებიან. ვუთხარი, რომ ერთი პოლიციელი არაა დასჯილი იმ სიმხეცისთვის, რასაც გაზაფხულიდან მოყოლებული სჩადიან. კმაყოფილი ვარ ამ შეხვედრით. ზუსტად იციან რა არის და როგორ, ცაში არ დაფრინავენ, კარგად არიან ინფორმირებულები“,- განაცხადა ალეკო ელისაშვილმა.