ისრაელმა შეერთებული შტატებისგან MK-84 ტიპის საავიაციო ბომბების ტვირთი მიიღო, - ინფორმაციას Reuters-ი ისრაელის თავდაცვის სამინისტროზე დაყრდნობით ავრცელებს.

„საბრძოლო მასალის ტვირთი, რომელიც ისრაელში ჩამოვიდა, წარმოადგენს მნიშვნელოვან აქტივს საჰაერო ძალებისთვის და ისრაელის თავდაცვის ძალებისთვის და ისრაელსა და შეერთებულ შტატებს შორის ძლიერი ალიანსის დამატებითი მტკიცებულებაა“, - განაცხადა ისრაელის თავდაცვის მინისტრმა, ისრაელ კაცმა.

შეგახსენებთ, აშშ-ის ყოფილი პრეზიდენტის, ჯო ბაიდენის ადმინისტრაციამ ისრაელში 2 000 ფუნტიანი (დაახლოებით 900 კგ-იანი) MK-84 ტიპის საავიაციო ბომბების გაგზავნა დაბლოკა იმ მიზეზით, რომ მჭიდროდ დასახლებულ ღაზას სექტორში მათი გამოყენების შემთხვევაში, მოსახლეობას სერიოზული საფრთხე შეექმნებოდა. დონალდ ტრამპმა მისი წინამორბედის ეს გადაწყვეტილება იანვარში გააუქმა.