ოკუპირებული ცხინვალის ე.წ. შინაგან საქმეთა მინისტრს პენსიონერი თავს დაესხა, - ამის შესახებ ინფორმაციას „ეხო კავკაზა“ „ტელეგრამ“ არხზე „საპა ცხინვალზე“ დაყრდნობით ავრცელებს.

გამოცემის ცნობით, ოკუპირებული ცხინვალის ე.წ. შინაგან საქმეთა მინისტრს, ალან გუჩმაზოვს 68 წლის პენსიონერი ჯოხით თავს მაშინ დაესხა, როდესაც გუჩმაზოვი ჯავის რაიონის სოფელ ხვწეში ადგილობრივებს ხვდებოდა.

გავრცელებული ინფორმაციით, ალან გუჩმაზოვმა ადგილობრივს შენიშვნა მისცა, რომ სხვები არ შეეწუხებინა, პასუხად კი პენსიონერმა ხელში ჯოხი რამდენჯერმე დაარტყა.

შემთხვევის შემდეგ პენსიონერი დააკავეს და დროებითი მოთავსების იზოლატორში მოათავსეს. სამედიცინო ექსპერტიზის განცხადებით, პენსიონერი არაფხიზელ მდგომარეობაში იმყოფებოდა, თუმცა გამოცემას არ დაუკონკრეტებია, კონკრეტულად რომელი მუხლით წაუყენეს ბრალი 68 წლის პენსიონერს.

ოკუპირებული ცხინვალის ე.წ. შინაგან საქმეთა სამინისტროს ინციდენტის შესახებ ინფორმაცია არ გაუვრცელებია.