რუსეთმა და შეერთებულმა შტატებმა მიიღეს გადაწყვეტილება, რომ ორმხრივი კონსულტაციები სტამბოლიდან მოსკოვში გადაიტანონ, - ამის შესახებ ვაშინგტონში რუსეთის ახალმა ელჩმა ალექსანდრე დარჩიევმა რუსულ მედიასთან ინტერვიუში განაცხადა.

კითხვაზე, დგამს თუ არა აშშ-ის ამჟამინდელი ადმინისტრაცია კონკრეტულ ნაბიჯებს რუსეთთან ურთიერთობების გაუმჯობესების მიზნით და როდის და სად იგეგმება ორი ქვეყნის დიპლომატიური მისიების ფუნქციონირების აღდგენის შესახებ კონსულტაციების შემდეგი რაუნდის ჩატარება, ელჩმა უპასუხა:

„მე უკვე ვთქვი, რომ რუსეთ-აშშ-ის ურთიერთობების სრულ ნორმალიზებამდე ჯერ კიდევ გრძელი გზაა გასავლელი და ეს პროცესი რთულია, რადგან მას ხელს უშლიან არა მხოლოდ თეთრი სახლის ოპონენტები - ანუ „დიფ სთეითი“, არამედ გარკვეული „ქორებიც“ კონგრესში, სადაც ძლიერი ანტირუსული ლობი შეიქმნა“, - აღნიშნა დარჩიევმა.

მისი თქმით, აშშ-რუსეთის ურთიერთობაში გარკვეული პროგრესი მაინც შეინიშნება.

„მნიშვნელოვანია, რომ გარკვეული პროგრესი მაინც შეინიშნება, რამაც ხელშესახები შედეგები გამოიღო, როგორიცაა 10 აპრილს სტამბოლში კონსულტაციების ბოლო რაუნდზე მიღებული წინასწარი გადაწყვეტილება მოლაპარაკებების [ორი ქვეყნის] დედაქალაქებში გადატანის შესახებ. შემიძლია დავადასტურო, რომ ორ დელეგაციას შორის შემდეგი მოლაპარაკებები უახლოეს მომავალში მოსკოვში გაიმართება“, - აღნიშნა ელჩმა.