მოსამართლე ნანა შამათავას გადაწყვეტილებით, „სილქ როუდ ჯგუფისა“ და „სილქნეტის“ დამფუძნებელს, გიორგი რამიშვილს აღკვეთის ღონისძიების სახით 70 000 ლარის ოდენობით გირაო შეეფარდა.

ბრალდებული გიორგი რამიშვილი სასამართლო სხდომის დარბაზიდან გაათავისუფლეს.

მოსამართლის განცხადებით ბრალდებულის მიმალვის საფრთხე მინიმალურია.

რამიშვილს გირაოს გადახდის ვადად 30 დღე განისაზღვრა.

საქმეზე წინასასმართლო სხდომა 26 აგვისტოს, 15:00 საათზე დაინიშნა.

როგორც ცნობილია, სასამართლო სხდომაზე პროკურორმა ნინო ციხისელმა წარადგინა შუამდგომლობა, რომ აღკვეთის ღონისძიების სახით გამოყენებული ყოფილიყო პატიმრობა. როგორც ის აცხადებდა, აღკვეთის ღონისძიების საფუძველს ქმნის დასაბუთბული ვარაუდი, რომ არსებობს მკაცრი სასჯელის შიშით მიმალვის საფრთხე. ბრალდებული თავისუფლებაზე ყოფნის შემთხვევაში ჩაიდენს ახალ დანაშაულს. ბრალდებული პატივს არ ცემს კანონს, რაზეც მეტყველებს ის ფაქტი, რომ ადმინისტრაციულ სამართალდარღვევის მოქმედებების გამო ხშირად იხდის ჯარიმებს.

ბრალდებულის ადვოკატის, ირმა ჭკადუას განცხადებით კი, სისხლის სამართლის საქმეში არ არის წარმოდგენილი მტკიცებულებები, რომელიც მიუთითებს, რომ ბრალდებული მიდრეკილია დანაშაულის ჩადენისკენ, მას არ უცდია მიმალვა, ითანამშრომლა გამოძიებასთან და ეს მიუთითებს, რომ ის კანონმორჩილი ადამიანია.

ადვოკატმა დააყენა შუამდგომლობა, რომ ბრალდებულის მიმართ გამოყენებული ყოფილიყო გირაო 50 ათასი ლარის ოდენობით და ის გათავისუფლდეს სხდომათა დარბაზიდან.