პოლონეთის არმიის განცხადებით, ქვეყნის საჰაერო სივრცეში ორი დრონი შეიჭრა
პოლონეთის საჰაერო სივრცეში დრონებით შეჭრა დაფიქსირდა, თუმცა მათ ზიანი არ გამოუწვევიათ, - Reuters-ის ცნობით, ამის შესახებ ქვეყნის შეიარაღებულ ძალებში განაცხადეს.
„გვქონდა საჰაერო სივრცის ორი დარღვევა. აღნიშნულ დარღვევას სრულად აკონტროლებდა ეროვნული ძალებისა და სახელმწიფო თავდაცვის სისტემის დაქვემდებარებაში მყოფი დანაყოფები“, - აღნიშნა შეიარაღებული ძალების ოპერატიულმა მეთაურმა, გენერალმა მაცეი კლიშმა.
გენერალური შტაბის უფროსის, გენერალ ვიესლავ კუკულას განცხადებით, დრონებმა პოლონეთის საჰაერო სივრცე ზიანის გამოწვევის გარეშე დატოვეს.
პოლონეთის არმიაში არ დააკონკრეტეს, თუ სად შეიჭრნენ დრონები პოლონეთის საჰაერო სივრცეში.
ცნობისთვის, ღამით რუსეთმა უკრაინის 500-ზე მეტი დრონით და ათობით რაკეტით შეუტია, რის შედეგადაც ენერგეტიკული და სატრანსპორტო ინფრასტრუქტურა 14 ობიექტზე დაზიანდა და რკინიგზის ოთხი მუშა დაშავდა.
