დარწმუნებული ვარ, ეს თავდადებული ადამიანები აუცილებლად დაბრუნდებიან სამშობლოში და იქნებიან დემოკრატიული ბელარუსის ლიდერები - ამის შესახებ პარტია „ევროპული საქართველოს“ ლიდერი, გიგი წერეთელი ბელარუსის ოპოზიციის ლიდერებთან, სვეტლანა ტიხანოვსკაიასთან და სერგეი ტიხანოვსკისთან შეხვედრის შესახებ სოციალურ ქსელში წერს.

როგორც გიგი წერეთელი აღნიშნავს, ოპოზიციის ლიდერებს ის ფლორიდაში შეხვდა, სადაც მათთან ერთად უსაფრთხოების, დემოკრატიისა და ევროატლანტიკური ურთიერთობების საკითხებზე გამართულ კონფერენციაში მონაწილეობდა.

„გულწრფელად გამიხარდა სვეტლანა ტიხანოვსკაიასთან და სერგეისთან შეხვედრა რამდენიმე დღის წინ ფლორიდაში. ჩვენ ერთად ვმონაწილეობდით უსაფრთხოების, დემოკრატიისა და ევროატლანტიკური ურთიერთობების საკითხებზე გამართულ კონფერენციაში.

სერგეის პირველად შევხვდი მისი ციხიდან გათავისუფლების შემდეგ და მძიმედ აღსაქმელი იყო მისი უმკაცრესი პოლიტიკური პატიმრობის ისტორიის გახსენება. ამავდროულად, სასიხარულოა, რომ ის მხნედაა და კვლავ, სვეტლანასთან და ოპოზიციის სხვა ლიდერებთან ერთად , ემიგრაციაში აგრძელებს ბრძოლას თავისუფალი და დემოკრატიული ბელარუსისთვის.

სვეტლანა ტიხონოვკაიას არაერთხელ, საჯაროდ განუცხადებია მხარდაჭერა ქართველი ხალხის დემოკრატიული და ევროპული მისწრაფებისთვის. მან კარგად იცის ამ ბრძოლის ფასი, საპროტესტო მოძრაობისა და პროდასავლური ოპოზიციის სირთულეები. პოლიტიკური პატიმრების გათავისუფლება და თავისუფალი არჩევნები მისი მთავარი მიზანია, ამიტომ სრულად სოლიდარულია საქართველოში საზოგადოების მნიშვნელოვანი ნაწილის ამავე მოთხოვნებთან. საინტერესო იყო მისი გამოცდილების და ხედვის მოსმენა.

დარწმუნებული ვარ, არც ისე შორია ის დრო, როცა ეს თავდადებული ადამიანები დაბრუნდებიან სამშობლოში, იქნებიან დემოკრატიული ბელარუსის ლიდერები, რომელიც თავისუფალ, ევროპულ საქართველოსთან ერთად ღირსეულ ადგილს დაიკავებს ცივილიზებული ქვეყნების გვერდით!“, - წერს გიგი წერეთელი.