კობახიძის უახლოეს გარემოცვად ვინც მოიაზრება, ის კაცი ჩამოალაბორანტეს - კობახიძის ჯერიც დადგება აუცილებლად, - ამის შესახებ „ლელო-ძლიერი საქართველოს“ ერთ-ერთმა ლიდერმა თაზო დათუნაშვილმა სამთავრობო ცვლილებებთან დაკავშირებით „პალიტრანიუსის“ გადაცემაში „რეზიუმე“ განაცხადა.

თაზო დათუნაშვილის თქმით, „ქართული ოცნების“ საპატიო თავმჯდომარემ, ბიძინა ივანიშვილმა მამუკა მდინარაძეს დასცინა.

„ამ სისტემაში კობახიძის ჯერიც რომ დადგება, გარდაუვალია, ასეთი სისტემა ჭამს საკუთარ შვილებს. მთავარი ის არის, ეს ქვეყანა როგორ უნდა გავიყვანოთ სამშვიდობოს, თორემ რა თქმა უნდა, კობახიძე შეეწირება ამ პროცესს. შემთხვევითი არ არის, რომ ახალგაზრდა ივანიშვილიც გამოვიდა და დაგმო კობახიძე ფაქტობრივად. ახლა ვხედავთ, რომ კობახიძის უახლოეს გარემოცვად ვინც მოიაზრება, ის კაცი ჩამოალაბორანტეს, სუს-ის უფროსზე დიდი თანამდებობა არ არსებობს.

ივანიშვილი ძალიან ცინიკური კაცია, სპეციფიკური იუმორის, ბოროტი იუმორის. დასცინა[მდინარაძეს] და რამდენიმე თვეში გაატარა ის გზა, რომელსაც საქართველოს შეიარაღებულ ძალებში ათწლეულები ანდომებენ, ერთმა ნორჩმა ოპერმუშაკმა მდინარაძემ უცებ მოახერხა და რამდენიმე თვეში გაიარა. გენერალ-მაიორის წოდება მიანიჭა და უთხრა, რომ ამიერიდან შენ იქნები ქვიშის კარიერის გენერალი, ჩამოქვეითებული უპორტფელო მინისტრი.

ძალიან ძნელია არაფორმალური მმართველის ფასადი იყო, კობახიძე ძალიან მძიმე მდგომარეობაშია და ყველა მისი წინამორბედი უმძიმეს მდგომარეობაში იყო, არ მეცოდება არცერთი წუთით, თავად იგდებს თავს საჯარო მონის მდგომარეობაში. ნებისმიერმა გადაბრუნებულმა სიტყვამ, ნებისმიერმა მის მიმართ ნათქვამმა კეთილმა სიტყვამ შეიძლება ივანიშვილს ეჭვების მთელი კორიანტელი გაუჩინოს. კობახიძეს რომ გაწირავს, ეს ცალსახაა, ყველა შემდეგს გაწირავს, რამდენის საშუალებაც ექნება“, - განაცხადა თაზო დათუნაშვილმა.