ჯანდაცვის მინისტრის განცხადება და ბავშვების სიცოცხლის გახანგრძლივებაზე ბუღალტერიაში შესვლა, არის იმედის დაკარგვა სახელმწიფოს მხრიდან მშობლებისადმი, - ამის შესახებ ბათუმის საკრებულოში „ძლიერი საქართველო-ლელოს” წევრმა, ვაჟა დარჩიამ დიუშენით დაავადებულ ბავშვების საკითხზე საუბრისას განაცხადა.

დარჩია იმედს იტოვებს, რომ „სახელმწიფოს ეყოფა გონიერება და გვერდში დაუდგება დიუშენით დაავადებული ბავშვების მშობლებს“.

„ყველა უნდა საუბრობდეს იმედზე. სახელმწიფოს ფუნქციაა ადამიანებისთვის იმედის დაბრუნება. ჯანდაცვის მინისტრმა, გუშინ, ეს იმედი მოუკლა იმ ადამიანებს, რომლებიც ბრძოლას აგრძელებენ თავიანთი შვილების მომავლისთვის. ჯანდაცვის მინისტრის განცხადება და ბავშვების სიცოცხლის გახანგრძლივებაზე ბუღალტერიაში შესვლა, არის იმედის დაკარგვა სახელმწიფოს მხრიდან მშობლებისადმი. ყველას მოვუწოდებ, ამ ადამიანებს მხარი დავუჭიროთ - 80-მდე ბავშვს გაუგრძელდეს სიცოცხლე, იქნება ეს ერთი წლით, ორი თუ ათი წლით, ყველამ მივიჩნიოთ ეს მთავარ ვალდებულებად. სოლიდარობა გამოვუცხადოთ ამ ადამიანებს, მშობლებს, რომლებიც იბრძვიან თავიანთი შვილების გადარჩენისთვის, იმედს ვიტოვებ, რომ სახელმწიფოს გონიერება ეყოფა და ბუღალტერია არ, რადგან ამაზე მნიშვნელოვანი საქმე სახელმწიფოს არ აქვს. სოლიდარობას ვუცხადებ ბავშვებს, მიეცით წამალი ბავშვებს!“,- განაცხადა ვაჟა დარჩიამ.