ევროპული საბჭოს გადაწყვეტილებით, ხუთი აზერბაიჯანული გემი ევროკავშირის სანქციების სიიდან ამოიღეს, - ინფორმაციას უკრაინული მედია ავრცელებს.

მათივე ინფორმაციით, ევროკავშირის საბჭოს მიერ 23 აპრილს მიღებული გადაწყვეტილების საფუძველზე, „აზერბაიჯანის კასპიის საზღვაო გადაზიდვების კომპანიის“ (ASCO) საკუთრებაში არსებულ გემ „ზაქათალას“, ასევე ASCO-სა და SOCAR-ის ერთობლივი საწარმოს საკუთრებაში არსებული გემების, „შუშას“, „ყარაბაღის“, „ხანკენდისა“ და „ზანგეზურის“ წინააღმდეგ დაწესებულის სანქციები მოიხსნა.

აზერბაიჯანული მედია წერს, რომ საკითხის დადებითი გადაწყვეტა შესაძლებელი გახდა აზერბაიჯანის რესპუბლიკის პრეზიდენტის ადმინისტრაციის, აზერბაიჯანის რესპუბლიკის საგარეო საქმეთა სამინისტროს, აზერბაიჯანის რესპუბლიკის ციფრული განვითარებისა და ტრანსპორტის სამინისტროს, ASCO-ს და SOCAR-ის მიერ განხორციელებული კოორდინირებული დიპლომატიური და სამართლებრივი ძალისხმევის შედეგად.

აზერბაიჯანული მედია ასევე განმარტავს, რომ ზემოაღნიშნული გემები გრძელვადიანი იჯარით იყო გაცემული მესამე მხარეებზე ჩარტერული ხელშეკრულებების საფუძველზე და მათი ექსპლუატაცია განხორციელდა საერთაშორისო რეგულაციების, მათ შორის საერთაშორისო სანქციების მოთხოვნების სრული დაცვით.