უკრაინის პრეზიდენტი ვოლოდიმირ ზელენსკი ევროპელ მოკავშირეებთან მოლაპარაკებებისთვის გაერთიანებულ სამეფოში ჩავიდა, - ინფორმაციას BBC-ი ავრცელებს.

მოლაპარაკებებს, რომელსაც დაუნინგ სთრითზე პრემიერ-მინისტრი კირ სტარმერი მასპინძლობს, ასევე ესწრებიან საფრანგეთის პრეზიდენტი ემანუელ მაკრონი და გერმანიის კანცლერი ფრიდრიხ მერცი.

ზელენსკი სოციალურ ქსელში წერს, რომ მთავარი საკითხი ომში უკრაინის თავდაცვის საკითხი იქნება.

„მთავარი აქცენტი ომში ჩვენს თავდაცვაზე, საჰაერო თავდაცვის სფეროში მთელი ევროპის უსაფრთხოებისთვის უფრო ფართო თანამშრომლობაზე და დიპლომატიური პერსპექტივების შესახებ ჩვენს საერთო ხედვაზეა - ევროპა მოლაპარაკებების ნაწილი უნდა იყოს და ძლიერი უნდა იყოს“, - აცხადებს ზელენსკი.

მან უკრაინის პარტნიორებს დახმარებისთვის და რუსეთზე ზეწოლისთვის მადლობა გადაუხადა.

„მადლობას ვუხდი გაერთიანებულ სამეფოს და ყველა ჩვენს პარტნიორს, რომლებიც რეალური ნაბიჯებით გვეხმარებიან სიცოცხლის დაცვის გაძლიერებასა და რუსეთზე ზეწოლის გაზრდაში მისი აგრესიის გამო. რუსეთმა ომი უნდა დაასრულოს“, - წერს ზელენსკი.