შაბათის მარშზე ცოტა ხნის წინ ხმაური იყო.

როგორც ,,ინტერპრესნიუსს" აქციის ერთ-ერთმა მონაწილემ, ანუკი ჩრდილელმა განუცხადა, მაშინ, როცა აქციის მომაწილეები მსვლელობას მართავდნენ, მათთან ერთ-ერთი უცნობი პირი მივიდა და შეურაცხმყოფელი სიტყვებით მიმართა, მათ შორის, მისივე განმარტებით, აღნიშნული პირი მასაც შეეხო.

ანუკი ჩდილელის თქმით, მოხდარს აქციის მონაწილეთა რეაქცია და შეძახილები მოჰყვა, რის შემდეგაც უცნობი პირი პოლიციამ გაიყვანა.

,,შაბათის მარშზე როგორც ხდება ხოლმე, ასე უშვებენ პროვოკატორებს და ჰგონიათ, რომ ავყვებით. ასეთ ე.წ. შეცდომებს არ დავუშვებთ, მაგრამ, როცა დედის გინებით შემოდის ადამიანი, არ არის მარტივი, მოითმინო. ხელითაც შემეხო ეს ადამიანი. მერე წაიქცა და შემდეგ როგორც ვიცი, პოლიციამ გაიყვანა",- განაცხადა ანუკი ჩრდილელმა.

,,ერთად ძალადობის და დაუსჯელობის წინააღმდეგ" - ამ ლოზუნგით მოქალაქეები ფილარმონიიდან საპროტესტო მსვლელობას მართავენ.

შაბათის ტრადიციული მარში დღეს უკავშირდება ,,ტვ.პირველის" ეთერში გასულ კადრებს,სადაც ჩანს, თუ როგორ სცემენ სამართალდამცველები პოლიციის განყოფილებაში მოქალაქეებს. მსვლელობის მონაწილეებს უჭირავთ ბანერები შემდეგი წარწერებით: ,,სისტემა უნდა დაინგრეს", ,,სისხლიანი 14 წელი", ,,როცა პოლიცია ძალადობს, ვის მივმართოთ?!".