უკრაინის საგარეო საქმეთა მინისტრის, ანდრეი სიბიგას, განცხადებით, რუსეთმა ბოლო დღეების განმავლობაში ცეცხლი გაუხსნა სულ მცირე სამ სამოქალაქო გემს, რის შედეგადაც ეკიპაჟის ათობით წევრი დაიღუპა და დაშავდა.

„რუსეთს გლობალური სასურსათო უსაფრთხოება მძევლად ჰყავს აყვანილი. ბოლო რამდენიმე დღის განმავლობაში რუსეთმა სულ მცირე სამი სამოქალაქო სატვირთო გემი დაბომბა. ეკიპაჟის რამდენიმე ათეული წევრი დაიღუპა და დაშავდა. დღეს უკრაინის შავი ზღვის საზღვაო დერეფანში არცერთ გემ არ გაუვლია - ზუსტად მოსავლის პიკის დროს. ეს მიზანმიმართული ეკონომიკური და ჰუმანიტარული ტერორია“, - დაწერა სიბიგამ სოციალურ ქსელში.

მინისტრმა რუსეთის ქმედებები შეადარა ჰორმუზის სრუტეში ენერგეტიკულ მარშრუტებზე ირანის მიერ განხორციელებულ თავდასხმებს და აღნიშნა, რომ რუსეთი ახლა მიზანმიმართულად ესხმის თავს გლობალურ სასურსათო ბაზრებს. სიბიგას თქმით, თუ ეს ტერორი გაგრძელდება აფრიკაში, აზიაში, ახლო აღმოსავლეთსა და ლათინურ ამერიკაში მილიონობით ოჯახი შესაძლოა ფასების მატებისა და შიმშილის წინაშე აღმოჩნდეს.

„უკრაინამ 27 ივლისს გაეროს უშიშროების საბჭოს საგანგებო სხდომა მოითხოვა. მოვუწოდებთ ყველა სახელმწიფოს, განსაკუთრებით დაზარალებულებს, დაუყოვნებლივ მოითხოვონ რუსეთისგან შავ ზღვაში ნაოსნობის თავისუფლებაზე თავდასხმების შეწყვეტა. არცერთ ქვეყანას არ აქვს უფლება, მსოფლიო აშიმშილოს. გლობალურ ზეწოლას შეუძლია შეაჩეროს რუსული ტერორი“, - აღნიშნა სიბიგამ.