თბილისის საქალაქო სასამართლოში ჯაშუშობის ბრალდებით დაკავებული ირაკლი ჩიხლაძის წინასასამართლო სხდომა მიმდინარეობს.

დღევანდელ სხდომაზე მტკიცებულების დასაშვებობაზე იმსჯელებენ. ამასთან, გადაისინჯება დაკავებულისთვის შეფარდებული აღკვეთის ღონისძიება - პატიმრობა.

პროცესი სასამართლოში დახურულ რეჟიმში ტარდება.

როგორც ჩიხლაძის ადვოკატი, შოთა კახიძე აცხადებს, ბრალდებულის წინააღმდეგ საქმეში ერთი მტკიცებულებაც არ არსებობს.

“განსახილველ საქმეს ადევს “საიდუმლო გრიფი”, ამიტომ მოკლებული ვარ შესაძლებლობას, საქმის კონკრეტული გარემოებების შესახებ ვისაუბრო. თუმცა, ცალსახად მინდა აღვნიშნო, რომ ირაკლი ჩიხლაძე არის სრულიად უდანაშაულო და საქმის მასალებში მისი ბრალეულობის დამადასტურებელი ერთი მტკიცებულებაც არ არსებობს”, - განაცხადა კახიძემ.

ცნობისთვის, ირაკლი ჩიხლაძე სახელმწიფო უსაფრთხოების სამსახურმა ჯაშუშობის ბრალდებით 30 მაისს დააკავა.

მას ბრალდება საქართველოს სსკ-ის 314-ე მუხლის პირველი ნაწილით წარედგინა, რაც ჯაშუშობას გულისხმობს. აღნიშნული ქმედება სასჯელის სახედ და ზომად 12 წლამდე თავისუფლების აღკვეთას ითვალისწინებს.

ირაკლი ჩიხლაძეს ედავებიან, რომ "უცხო ქვეყნის სპეცსამსახურის დავალებების შესაბამისად, მართავდა სხვადასხვა პირისგან შემდგარ სადაზვერვო ქსელს, კოორდინაციას უწევდა მათ საქმიანობას და უზრუნველყოფდა მიღებული ინფორმაციის შეგროვებასა და გადაცემას".