დღეს წმინდა შუშანიკის ხსენების დღეა
საქართველოს მართლმადიდებელი ეკლესია 10 სექტემბერს დიდმოწამე დედოფლის წმინდა შუშანიკის ხსენების დღეს აღნიშნავს. ამასთან დაკავშირებით ტაძრებში სადღესასწაულო წირვა-ლოცვა ჩატარდება.
ეს დღე განსაკუთრებულად აღინიშნება მეტეხის ტაძარში, სადაც წმინდა დედოფალი განისვენებს.
წმინდა დედოფალი შუშანიკი სარწმუნეობის დაცვისთვის მე-5 საუკუნეში, 475 წელს აღესრულა. ეროვნებით სომეხი, ქრისტიანულ ოჯახში აღზრდილი დედოფალი ბავშვობიდანვე ღვთისმოშიში იყო. იგი ჰერეთის პიტიახშის, ვარსქენის მეუღლე იყო. ამ დროს ქართლში სპარსელები ბატონობდნენ. მათდამი კეთილგანწყობის მოსაპოვებლად ვარსქენმა მართლმადიდებლობა უარყო და მაზდეანობა მიიღო. დედოფალსაც რწმენის შეცვლა მოსთხოვა, რაზეც შუშანიკისგან მტკიცე უარი მიიღო. წმინდა დედოფალმა ვარსქენისგან უამრავი ტანჯვა დაითმინა. 6 წელი ციხეშიც გაატარა, სადაც მასთან მისულებს კურნავდა და ეხმარებოდა.
წმ. დედოფლის მოწამეობრივი ცხოვრება იაკობ ხუცესმა ჰაგიოგრაფიულ ნაწარმოებში - „წამებაი წმიდისა შუშანიკისი, დედოფლისაი“ აღწერა.
v-if="article.gallery" v-html="article.gallery"
