დიდ ბრიტანეთში „ნოვიჩოკით“ მოწამლული პირი გარდაიცვალა

44 წლის დონ სტერჯესი, რომელიც დიდი ბრიტანეთის ქალაქ ეიმსბერიში ნერვულ-პარალიტიკური ნივთიერება „ნოვიჩოკით“ მოიწამლა, გარდაიცვალა.

ამ ნივთიერებით გასულ კვირას ორი ადამიანი მოიწამლა. პოლიცია ამჟამად ცდილობს გაარკვიოს, თუ რა ვითარებაში მოიწამლნენ დონ სტერჯესი და 45 წლის ჩარლი როული, რომლებიც სხვადასხვა ქალაქებში ცხოვრობდნენ.

მომხდარის შესახებ სტერჯესის ოჯახი უკვე ინფორმირებულია, მის ნათესავებთან სპეციალური სამსახურების თანამშრომლები მუშაობენ.

ბრიტანეთის ხელისუფლება ვარაუდობს, რომ სტერჯესი და როული იმ ნერვულ-პარალიტიკური ნივთიერების ნარჩენებით მოიწამლნენ, რომელიც სკრიპალების წინააღმდეგ იყო გამოყენებული.