როგორც ვიცი, საუბარია რაღაც 5 წლის წინანდელ ჩანაწერზე, - ამის შესახებ პარლამენტის თავმჯდომარის პირველმა მოადგილემ, თამარ ჩუგოშვილმა განაცხადა, რითაც გამოეხმაურა ჩანაწერს, სადაც სავარაუდოდ, მმართველი პარტიის ერთ-ერთი დამფუძნებელი ლევან ყიფიანი “ომეგა ჯგუფის“ დამფუძნებელ ზაზა ოქუაშვილს ტელეკომპანია “იბერიის“ დათმობაზე ესაუბრება.

„მე როგორც ვიცი, საუბარია რაღაც 5 წლის წინანდელ ჩანაწერზე. გამიჭირდება ამაზე ვისაუბრო. მე ეს ინფორმაცია მაქვს, შეიძლება ვცდები, მაგრამ მითხრეს, რომ წლების წინანდელ ჩანაწერზეა ლაპარაკი. საგამოძიებო ორგანოები თუ ჩათვლიან, რომ რაიმე დანაშაულის ნიშნებია, დარწმუნებული ვარ, ამას მიაქცევენ ყურადღებას“, - განაცხადა ჩუგოშვილმა.

სამაუწყებლო კომპანია "რუსთავი2"-მა აუდიოჩანაწერი გაავრცელა, სადაც მათი წყაროს ინფორმაციით, ერთმანეთს სპორტის ყოფილი მინისტრი ლევან ყიფიანი და „ომეგა ჯგუფის” დამფუძნებელი ზაზა ოქუაშვილი ესაუბრებიან. მათივე ინფორმაციით, ჩანაწერში ლევან ყიფიანი ამბობს, რომ "ომეგა ჯგუფის" პრობლემებს უჩა მამაცაშვილი აგვარებდა, სანაცვლოდ კი ორ მილიონს ითხოვდა.