ყველამ კარგად ვიცით, რომ ამ ოპერაციის ერთ-ერთი მთავარი დამფინანსებელი ბიძინა ივანიშვილი იყო და მისი სახელი საერთოდ არ ფიგურირებს ამ ძიებაში, - ამის შესახებ 7 ნოემბერის საქმეზე ჩვენების მიცემის შემდეგ ჟურნალისტებთან საუბარში კახა კუკავამ განაცხადა.
როგორც ის განმარტავს, საქმეს სერიოზული გამოძიება სჭირდება, რადგან არის მცდელობა, ჯოხი მხოლოდ გაქცეულ პოლიტიკოსებზე გადატეხონ.
„7 ნოემბრამდე და 7 ნოემბრის შემდეგ განვითარებული მოვლენების მონაწილე ვარ. რაც ხდებოდა მაშინ ძალადობა, მომიტინგეების, ჟურნალისტების მიმართ, ამ ყველაფერზე ჩვენება მივეცი. ამ საქმეს მაინც დასჭირდება სერიოზული გამოძიება, რადგან არის მცდელობა, ვინც გაქცეულია, იმაზე გადატეხონ ჯოხი.
7 ნოემბრის დარბევა ეს იყო ძალიან მასშტაბური ოპერაცია, რომელშიც მონაწილეობდა მთავრობის სხვადასხვა რგოლი, მონაწილეობდნენ ისეთი სახის ძალოვანი სტრუქტურები, რომელთაც ქვეყნის შიგნით საერთოდ არ აქვთ სამხედრო ოპერაციებში მონაწილეობის უფლება. მაგალითად, გენშტაბის უფროსი, გოგავა უშუალოდ ხელმძღვანელობდა რუსთაველის გამზირზე დარბევას და ის პასუხისგებაში მიცემული არ არის, არც სხვა სპეცრაზმელები.
გარდა ამისა, ყველამ კარგად ვიცით, რომ ამ ოპერაციის ერთ-ერთი მთავარი დამფინანსებელი ბიძინა ივანიშვილი იყო და მისი სახელი საერთოდ არ ფიგურირებს ამ ძიებაში", - განაცხადა კუკავამ.
დღეს, თბილისის საქალაქო სასამართლოში 7 ნოემბრის დარბევის საქმეზე ჩვენება კახა კუკავამ, ლევან გაჩეჩილაძემ და ზვიად ძიძიგურმა მისცეს.