საქართველოს პრეზიდენტმა ქვემო ქართლში სასათბურე მეურნეობები დაათვალიერა
საქართველოს პრეზიდენტმა სალომე ზურაბიშვილმა, ქვემო ქართლის ადგილობრივი ხელისუფლების წარმომადგენლებთან ერთად, სოფელ დამია-გეურარხში სასათბურე მეურნეობა დაათვალიერა და დასაქმებულებს შეხვდა. ინფორმაციას პრეზიდენტის ადმინისტრაცია ავრცელებს.
საქართველოს პრეზიდენტი რეგიონში სოფლის მეურნეობის დარგის განვითარებით დაინტერესდა და მისი განვითარების მნიშვნელობაზე საუბრისას მცირე ბიზნესის როლს გაუსვა ხაზი.
მარნეულის მუნიციპალიტეტის სოფელ დამია–გეურარხის სასათბურე მეურნეობა 2014 წელს გაისხნა. სათბური 2 ჰექტარ მიწის ფართობზე მდებარეობს. მისი წარმოებადობა წელიწადში 300-400 ტონა ბოსტნეულს შეადგენს.
სალომე ზურაბიშვილმა ასევე დაათვალიერა მარნეულის მუნიციპალიტეტის სოფელ აზიზქენდში სახელმწიფოს ხელშეწყობით გახსნილი და
თანამედროვე სტანდარტებით აღჭურვილი სასათბურე მეურნეობა - შპს „მზა ჩითილი“.
მეურნეობაში, სადაც 30 ადამიანია დასაქმებული, წლიურად 30 მილიონი ჩითილის წარმოებაა შესაძლებელი. პროდუქციის რეალიზაცია ადგილობრივ ბაზარზე ხდება. საწარმოში ჯამურად 1 584 000 აშშ დოლარი ინვესტიცია განხორციელდა.
კომპანია „მზა ჩითილი“ ინოვაციური ტექნოლოგიების გამოყენებით ქართველ ფერმერებს დიდი რაოდენობის ბოსტნეულის და ყვავილების ნერგებით ამარაგებს.
აღინიშნა, რომ ანალოგიური საწარმო ჩვენს ქვეყანაში არ არსებობდა და ქართველ მეწარმეებს მსგავსი ჩითილების შეძენა მხოლოდ უცხოეთიდან უწევდათ.
v-if="article.gallery" v-html="article.gallery"
