პარლამენტის იურიდიულ საკითხთა კომიტეტის თავმჯდომარის, ანრი ოხანაშვილის განცხადებით, სავარაუდოდ, იგეგმებოდა უმძიმესი დანაშაულის ჩადენა და სახელმწიფო უსაფრთხოების სამსახურმა აღნიშნულის პრევენცია მოახდინა. ამის შესახებ ოხანაშვილმა მალხაზ მაჩალიკაშვილთან დაკავშირებით სუს-ის მიერ გამოქვეყნებულ ჩანაწერზე საუბრისას განაცხადა.

როგორც ოხანაშვილმა აღნიშნა, კონკრეტული უწყების პრეროგატივაა, რა მტკიცებულებებზე დაყრდნობით წარმართავს ამ პროცესს.

„ჩვენ რაც მოვისმინეთ და ვნახეთ სახელმწიფო უსაფრთხოების სამსახურის ბრიფინგის შედეგად, რომ იგეგმებოდა სავარაუდოდ, უმძიმესი დანაშაულის ჩადენა. ჩვენმა სახელმწიფომ, სახელმწიფო უსაფრთხოების სამსახურმა მოახდინა აღნიშნულის პრევენცია. ეს არის ძალიან მნიშვნელოვანი. რაც შეეხება კონკრეტულ მტკიცებულებებს, ეს არის კონკრეტული უწყების პრეროგატივა. დაველოდოთ კონკრეტულ ქმედებებს, ვინაიდან ჩემი ინფორმაციით, გრძელდება შესაბამისი საგამოძიებო მოქმედებების განხორციელება და ეს უკვე კონკრეტული უწყების პრეროგატივაა, რა მტკიცებულებებზე დაყრდნობით როგორ და რანაირად წარმართავს შემდგომ ამ პროცესს", - განაცხადა ოხანაშვილმა.