საქართველოს პარლამენტის სახელით და პარლამენტის თავმჯდომარის დავალებით, გილოცავთ პროკურატურის თითოეულ თანამშრომელს პროფესიულ დღეს. ჩვენი და თქვენი საერთო პასუხისმგებლობაა, რომ ეს ძალიან დიდი შანსი, რომელიც ამ კონსტიტუციით მივიღეთ, ანუ, პროკურატურის დამოუკიდებლობის ახალი სტანდარტი, გამოვიყენოთ მაქსიმალურად ეფექტურად, - ამ სიტყვებით მიულოცა საქართველოს პარლამენტის პირველმა ვიცე-სპიკერმა თამარ ჩუგოშვილმა სახელმწიფო ცერემონიების სასახლეში შეკრებილ პროკურორებს პროფესიული დღე.

მისივე თქმით, პროკურატურა არის ყველა დემოკრატიული ქვეყნის მნიშვნელოვანი ინსტიტუტი, რომელიც განსაკუთრებულ როლს ასრულებს კანონის უზენაესობის, ადამიანების უფლებების დაცვის, დანაშაულთან ბრძოლის და რაც ყველაზე მნიშვნელოვანია, ქვეყნის სტაბილურობისა და განვითარების საკითხში.

,,კონსტიტუციის თანახმად, პროკურატურა დამოუკიდებელი კონსტიტუციური ორგანოა, იგი აღარ არის რომელიმე სახელისუფლებო შტოს ნაწილი, ეს რეფორმა ერთი შეხედვით უმნიშვნელოვანესი რეფორმაა, მაგრამ ამავე დროს ძალიან მნიშვნელოვანი გამოწვევაც. განსაკუთრებით აღსანიშნავია ის, რომ სისხლის სამართლის პოლიტიკის მიმართ ძირითად მიმართულებებს ასევე ამტკიცებს პარლამენტი. სწორედ პარლამენტი იღებს ისეთ მნიშვნელოვან კანონებს, რომლებიც პირადაპირ არის დაკავშირებული პროკურატურის საქმიანობასთან და რა თქმა უნდა, ეს ყველაფერი კიდევ ერთხელ უსვამს ხაზს, რამდენად მნიშვნელოვანი არის პარლამენტსა და პროკურატურას შორის ჯანსაღი, გამჭვირვალე ურთიერთობების დამკვიდრება“ , - განაცხადა თამარ ჩუგოშვილმა.

მისივე თქმით, პროკურატურის დამოუკიდებლობის პროცესის გაუმჯობესებისთვის მნიშვნელოვანია საზოგადოების ნდობა და ვიცე-სპიკერმა პროკურორებს სწორედ მაღალი საზოგადოებრივი ნდობის მოპოვება უსურვა.

„ჩვენი და თქვენი საერთო პასუხისმგებლობაა, რომ ეს ძალიან დიდი შანსი, რომელიც ამ კონსტიტუციით მივიღეთ, ანუ, პროკურატურის დამოუკიდებლობის ახალი სტანდარტი, გამოვიყენოთ მაქსიმალურად ეფექტურად. ძალიან მნიშვნელოვანია ამ პროცესში საზოგადოების ნდობა და პირველი რაც მინდა თქვენ გისურვოთ, არის სწორედ მაღალი საზოგადოებრივი ნდობა“ , - განაცხადა თამარ ჩუგოშვილმა.