“სამოქალაქო მოძრაობის” ლიდერი ალეკო ელისაშვილი ყოფილ შს მინისტრთან, ვანო მერაბიშვილთან თანამშრომლობას გამორიცხავს.

როგორც მან ჟურნალისტებთან საუბრისას აღნიშნა, “სამოქალაქო მოძრაობას” ვანო მერაბიშვილთან არანაირი ღირებულებითი საკითხი არ აკავშირებს.

“ ე.წ. გაერთიანებულ ოპოზიციაში ჩვენ ვართ მხოლოდ ერთი მიზნით, რომ გადავიდეთ არჩევნების პატიოსან წესზე, ანუ , პროპორციულ არჩევნებზე. იქ შეკრებილ პარტიების 99%-თან სხვა არაფერი ღირებულებითი არ გვაკავშირებს. ისევე, როგორც არანაირი ღირებულებითი საკითხი არ გვაკავშირებს ვანო მერაბიშვილთან. აბსოლუტურად გამოვრიცხავთ მასთან რაიმე ფორმით თანამშრომლობას. დღემდე თვალით ნანახიც არ მყავს ვანო მერაბიშვილი და ამ დანაკლისის შევსებასაც არ ვაპირებ, მით უფრო იმ განცხადების ფონზე. იმედს დავიტოვებ, რომ ციხიდან რომ გამოვიდა მერაბიშვილი, ამდენი ჟურნალისტი ერთად დაინახა ვერ მოზომა თავის სათქმელი და დააბრეხვა, სხვა შემთხვევაში 2003 წლის რევოლუციური რიტორიკის მოსმენა არავის არ უნდა, ჩვენ განსაკუთრებით”,- განაცხადა ელისაშვილმა.

შეგახსენებთ, შინაგან საქმეთა ყოფილმა მინისტრმა, მსჯავრდებულმა ვანო მერაბიშვილმა თითქმის 7-წლიანი პატიმრობის შემდეგ, პენიტენციურ დაწესებულება, ე.წ. მატროსოვის ციხე დღეს დატოვა.