თბილისის საქალაქო სასამართლოში, 20 ივნისის საქმეზე ბრალდებული თავდაცვის ყოფილი მინისტრის, პარტია „გამარჯვებული საქართველოს“ ლიდერის, ირაკლი ოქრუაშვილის სასამართლო პროცესი მიმდინარეობს.
დღევანდელ პროცესზე დაცვის მხარის მოწმეს, „ევროპული საქართველოს” წევრ ელენე ხოშტარიას კითხავენ. როგორც ხოშტარიამ ჟურნალისტებს პროცესის დაწყებამდე განუცხადა, ის დაადასტურებს, რომ 20 ივნისის აქციაზე ირაკლი ოქრუაშვილის მხრიდან რაიმე ძალადობას ან ძალადობისკენ მოწოდებას ადგილი არ ჰქონია.
რაც შეეხება ადვოკატს, მამუკა ჭაბაშვილის განცხადებით, რაიმე სახის შუამდგომლობის დაყენებას არ აპირებს. მისი თქმით, საპროცესო შეთანხმება გამორიცხულია, რადგან ოქრუაშვილი ბრალს არ აღიარებს. თავად ოქრუაშვილი პროცესს არ ესწრება.
ცნობისთვის, ირაკლი ოქრუაშვილი 20 ივნისის აქციის დარბევისას სსკ-ს 225-ე მუხლით გათვალისწინებული დანაშაულისთვის დააკავეს, რაც ჯგუფური ძალადობის ორგანიზებას, ხელმძღვანელობას და მასში მონაწილეობას გულისხმობს.