მარინა ეზუგბაია - ინფექციურ საავადმყოფოში მძიმე პნევმონიით, პრობლემური პაციენტები არ გვყავს
თბილისის ინფექციური საავადმყოფოს კლინიკური დირექტორის, მარინა ეზუგბაიას განცხადებით, კორონავირუსით ინფიცირების 4 ახალი შემთხვევიდან 1 „საბურთალოს კლასტერიდანაა“, 3 კი სატვირთო ავტომობილის მძღოლია.
როგორც მან ჟურნალისტებს განუცხადა, სატვირთო ავტომობილის მძღოლები საქართველოს მოქალაქეები არ არიან.
„მხოლოდ 4 ახალი დადასტურებული შემთხვევა შემოგვემატა, გამოჯანმრთელებულთა რიცხვი მხოლოდ 6-ით გაიზარდა, ეს არის უკვე 80% გამოჯანმრთელებული. ამ ეტაპზე კოვიდცენტრეში 147 კოვიდდადასტურებული მკურნალობს. 4 ახალი შემთხვევიდან 1 არის საბურთალოს კლასტერიდან, დანარჩენი 3 სატვირთო ავტომობილის მძღოლი, ეს არის შემოტანილი შემთხვევა, იმპორტირებული, არა საქართველოს მოქალაქეები”, - განაცხადა ეზუგბაიამ.
რაც შეეხება ინფექციურ საავადმყოფოს, ეზუგბაიას თქმით, 2 ახალი პაციენტი მოთავსდა და ჯამში, 57 ინფიცირებული მკურნალობს.
„ჩვენს ცენტრში ამ ეტაპზე 57 დადასტურებული შემთხვევა გვყავს, 2 შემოგვემატა გუშინ, ეს არის ჩვენთან მკურნალობაზე მყოფი პაციენტების ოჯახის წევრები, საბურთალოს კლასტერიდან, 2-იც გამოჯანმრთელდა და დატოვა კლინიკა. პაციენტები მძიმე პნევმონიით და პრობლემური პაციენტები არ გვყავს. ძირითადად უკვე საშუალო სიმძიმის პაციენტები ჭარბობს ამ 57-ში და მცირე რაოდენობის არის მსუბუქი მიმდინარეობით”, - აღნიშნა ეზუგბაიამ.
