სჯობს, დავიცვათ წესი და არ ავიდეთ გადაჭედილ სამარშრუტო ტაქსში თუ საქალაქო ტრანსპორტში , - ამის შესახებ დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ ე.წ. პიკის საათებში ავტობუსების გადატვირთვის თაობაზე დასმული შეკითხვის პასუხად განაცხადა.

მან მოქალაქეებს კორონავირუსთან დაკავშირებით გაცემული რეკომენდაციების გათვალისწინებისკენ მოუწოდა.

„ჩვენი რეკომენდაციები იყო და არის, რომ საქალაქო ტრანსპორტით გადაადგილებისას გაჩერებებს შორის დრო შემცირებულიყო. რამდენადაც ვიცი, ქალაქის ხელმძღვანელობა მაქსიმალურად შეეცადა, ეს დრო შემცირებულიყო. რა თქმა უნდა, ყველაფერს თავისი საზღვარი აქვს, ანუ შეგვიძლია, თუ არა და რა რესურსი გვაქვს. ქართველები მიჩვეულები ვართ და არ გვინდა ორ წუთზე მეტი ლოდინი, თუნდაც 10 წუთი დავიცადოთ. რას ვიზამთ, ამ დროს სჯობს, რომ დავიცვათ წესი და არ ავიდეთ გადაჭედილ სამარშუტო ტაქსში თუ საქალაქო ტრანსპორტში“, - განაცხადა გამყრელიძემ.