"ქართული ოცნება-დემოკრატიული საქართველოს" ცენტრალურ ოფისთან, მოძრაობა "შეცვალეს" წევრებმა და სამოქალაქო აქტივისტებმა აქცია გამართეს. აქციის მონაწილეები სასამართლოს გადაწყვეტილებას აპროტესტებდნენ, რომლის თანახმადაც "მთავარი არხის" ერთ-ერთ მეწილეს გიორგი რურუას 4 წლით პატიმრობა მიესაჯა.

მათ შენობის მიმდებარე ტერიტორია სიმბოლურად ყვითელი ლენტით შემოსაზღვრეს. ორგანიზაცია შეცვალეს წევრის ნიკა ფარულავას განცხადებით, ყვითელი ლენტი ნიშნავს დამნაშავე რეჟიმს.

„მათ ჰყავთ პოლიტპატიმრები, როგორც ჩვენი საერთაშორისო პარტნიორები აღნიშნავენ და გიორგი რურუას პატიმრობაში დარჩენით ფაქტიურად ბიძინა ივანიშვილმა უთხრა ყველას, რომ რვა მარტის შეთანხმებას არ ასრულებს“,-აცხადებს ფარულავა.

აქციის მონაწილეების თქმით, ისინი შეიკრიბნენ რათა, პოლიტიზირებული სასამართლო და დარღვეული შეთანხმება გააპროტესტონ.​ პროტესტის მონაწილეების განცხადებით, გიორგი რურუას პატიმრობაში დატოვებით ბიძინა ივანიშვილმა და “ქართულმა ოცნებამ” 8 მარტის შეთანხმება არ შეასრულა, რაც ნიშნავს , რომ წინასაარჩევნო გარემო და არჩევნების დღე რეპრესიებისა და ძალადობის ფონზე ჩაივლის.

ტერიტორიაზე იმყოფებოდნენ სამართალდამცველები.