სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოსა და მიგრაციის საერთაშორისო ორგანიზაციას (IOM) შორის ურთიერთთანამშრომლობის მემორანდუმი გაფორმდა. ამის შესახებ“ინტერპრესნიუსს“ ჯანდაცვის სამინისტროდან აცნობეს.

მათი ინფორმაციით, მემორანდუმის მიზანია ადამიანით ვაჭრობის (ტრეფიკინგის) მსხვერპლთა დაცვისა და დახმარების მიმართულებით თანამშრომლობა.

მემორანდუმს ხელი მოაწერეს სააგენტოს დირექტორმა, მერი მაღლაფერიძემ და მიგრაციის საერთაშორისო ორგანიზაციის საქართველოს მისიის ხელმძღვანელმა, სანია ჩელებიჩ ლუკოვაცმა. სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოს მიგრაციის საერთაშორისო ორგანიზაციასთან მრავალწლიანი მჭიდრო თანამშრომლობა აკავშირებს. განსაკუთრებით მნიშვნელოვანია საერთაშორისო პარტნიორის მხარდაჭერა ტრეფიკინგის მსხვერპლთა დახმარების მიმართულებით.

„ტრეფიკინგი გლობალური დანაშაულია და საერთაშორისო ორგანიზაციების ჩართულობა მსხვერპლების დახმარების ნაწილში არის ძალიან მნიშვნელოვანი“, - განაცხადა სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოს დირექტორმა მერი მაღლაფერიძემ.

მისი თქმით, სააგენტო ცდილობს ურთიერთთანამშრომლობის ფარგლებში პარტნიორის მხარდაჭერით გააფართოვოს მოქმედების არეალი, გაზარდოს მოსახლეობის ცნობიერება, საინფორმაციო კამპანიების წარმართვით და მასალების გავრცელებით და ერთობლივი ძალისხმევით მიაღწიოს საერთაშორისო სტანდარტს.

„მიგრაციის საერთაშორისო ორგანიზაციას მუდმივად შეჰქონდა აქტიური წვლილი საქართველოს ეროვნული რეფერირების მექანიზმში ადამიანით ვაჭრობის/ტრეფიკინგის მსხვერპლთა დაცვის კუთხით. მაგალითად, 2020 წელს IOM-მა ტრეფიკინგის სავარაუდო სამი მსხვერპლი გადაამისამართა სააგენტოსთან. სამივე მათგანი იყო წარმოშობით ცენტრალური აზიის ქვეყნებიდან. IOM კვლავაც გააგრძელებს სააგენტოსთან შეთანხმებულ და კოორდინირებულ მუშაობას და იმედოვნებს მიგრანტი ბავშვების დაცვის მიმართულებით საქმიანობის/ხედვის გაფართოებას“, - განაცხადა მიგრაციის საერთაშორისო ორგანიზაციის საქართველოს მისიის ხელმძღვანელმა, სანია ჩელებიჩ ლუკოვაცმა.