ამირან გამყრელიძე - კერძო და საჯარო სკოლებში დასაქმებულთა ვაქცინაციის მაჩვენებელი 70%-ის ფარგლებშია, 100% არსად არაა

100%-იანი ვაქცინაციის მაჩვენებელი არსად არის, მათ შორის არც კერძო სკოლებში. გასულ კვირას როგორც საჯარო, ისე კერძო სკოლებში ჩვენ შევისწავლეთ აცრის მაჩვენებელი და 100% არსად არის, - ამის შესახებ დაავადებათა კონტროლის ეროვნული ცენტრის უფროსმა, ამირან გამყრელიძემ საკოორდინაციო საბჭოს სხდომის შემდეგ ჟურნალისტებთან საუბრისას განაცხადა.

მისივე თქმით, საჯარო და კერძო სკოლებს შორის ვაქცინაციის მაჩვენებელი მკვეთრად არ განსხვავდება. როგორც მან აღნიშნა, ორივე ტიპის სასწავლო დაწესებულებებში ეს მაჩვენებელი 70%-მდე მერყეობს.

„ოქტომბერში სწავლა აუცილებლად უნდა დაიწყოს და დაავადებათა კონტროლის ცენტრი ადასტურებს თავის მზაობას, რათა სწავლა ადგილზე აღდგეს. ჩვენი რეკომენდაციაა, რომ სკოლებში აცრის მაჩვენებელი იყოს 80%. ამავე დროს, ანგარიშგასაწევი იქნება ისიც, რომ რამდენ ადამიანს ექნება გადატანილი ვირუსი, რაც შედის საერთო იმუნიტეტში. ვიტყვი იმასაც, რომ არამხოლოდ მასწავლებლები, არამედ მშობლებმაც კეთილი უნდა ინებონ და ოჯახის დანარჩენ წევრებთან ერთად აუცილებლად უნდა გაიკეთონ ვაქცინა. მხოლოდ ამ შემთხვევაში განიხილება სწავლის აღდგენა და ის აუცილებლად უნდა აღდგეს კლასებში“, - განაცხადა ამირან გამყრელიძემ.

ამასთან, მან საზოგადოებას განათლების სფეროში ვაქცინაციის სტატისტიკური მონაცემებიც მოახსენა.

„საჯარო სკოლების მთელი პერსონალის 55% მინიმუმ ერთი დოზით არის აცრილი, აქედან სრულად აცრილია 33%. პედაგოგების მინიმუმ ერთი აცრის მაჩვენებელია 58%, საიდანაც სრულად აცრილია 36%. კერძო სკოლების პედაგოგებიდან მინიმუმ ერთ დოზით აცრილია 64%, ხოლო სრულად აცრილია 44%, საიდანაც ყველაზე მაღალი მაჩვენებელია თბილისში - 70%.

სამწუხაროდ, ყველაზე დაბალია აცრის მაჩვენებელი სტუდენტებში. ჩვენ დავთვალეთ ბაკალავრებში, მაგისტრებსა და დოქტორანტებში ვაქცინაციის მაჩვენებელი და ის გახლავთ მხოლოდ 17%“, - აღნიშნა გამყრელიძემ.

კახა გოგოლაშვილი - ევროპარლამენტი საქართველოს ევროკავშირში ინტეგრაციის შესაძლებლობას ზრდის, ახლა ჯერი ჩვენზეა
ქართული პრესის მიმოხილვა 05.12.2022
დავით სიხარულიძე - ისტორიას არ ახსოვს, რომ რომელიმე ქვეყანა ძალით ნატო-ში, ან ევროკავშირში მიეღოთ
კახა ოქრიაშვილი: „ოცნებას“ უკრაინაში გამარჯვების შემდეგ ქართველი პატრიოტების საქართველოში დაბრუნების ეშინია!“
ახალი შესაძლებლობა IT სფეროს წარმომადგენლებისთვის - "Devexperts" უკვე საქართველოშია
2022 წლის საუკეთესო ამერიკული არქიტექტორული კომპანია ბათუმის ხელოვნურ კუნძულზე შენობას დააპროექტებს
როგორ შევარჩიოთ საახალწლო საჩუქარი