კორონავირუსის “ომიკრონ“ ვარიანტი უფრო სწრაფად ვრცელდება, ვიდრე „დელტა“ ვარიანტი და ვაქცინირებული ან ვირუსისგან გამოჯანმრთელებული ადამიანების დაინფიცირებასაც იწვევს, - ამის შესახებ ჯანდაცვის მსოფლიო ორგანიზაციის დირექტორმა ტედროს ადანომ გებრეისუსმა განაცხადა.
„არსებობს მყარი მტკიცებულება, რომ „ომიკრონი“ „დელტა“ ვარიანტზე მნიშვნელოვნად უფრო სწრაფად ვრცელდება და მეტი ალბათობაა, რომ ვაქცინირებული ან კოვიდ-19-ისგან გამოჯანმრთელებული ადამიანები დაინფიცირდნენ ან რეინფიცირება მოხდეს,“- აღნიშნა ჯანმო-ს ხელმძღვანელმა.
ამასთან, ჯანდაცვის მსოფლიო ორგანიზაციის უფროსი მეცნიერის, სუმია სვამინათანის განმარტებით, წინასწარი მტკიცებულებებიდან დასკვნის გაკეთება, რომ „ომიკრონი“ უფრო მსუბუქ სიმპტომებს იწვევს "არაკეთილგონივრული" იქნება.
”რიცხვების მატებასთან ერთად, ჯანდაცვის ყველა სისტემა დაიტვირთება,” - აღნიშნა მეცნიერმა.
კორონავირუსის „ომიკრონ“ ვარიანტი პირველად სამხრეთ აფრიკაში, ნოემბრის ბოლოს დაფიქსირდა. ჯანდაცვის მსოფლიო ორგანიზაციაში აცხადებენ, რომ „ომიკრონი“ „ძალიან მაღალ" გლობალურ რისკს წარმოადგენს.