კახა კალაძე - ბიძინა ივანიშვილი არის ადამიანი, რომელმაც მოახერხა და შეძლო სისხლიანი რეჟიმი, ქვეყნის მტრები და ანტისახელმწიფოებრივად მოაზროვნე ადამიანები მოეშორებინა ქვეყნის მმართველობიდან

ყველა დათქმა, რომელიც იყო დათქმული, ყველაფერი იქნება გაკეთებული, როგორც ეს გავაკეთეთ ვიზალიბერალიზაციასთან დაკავშირებით, ასოცირების ხელშეკრულობასთან დაკავშირებით და თავისუფალ ვაჭრობასთან დაკავშირებით, - ასე გამოეხმაურა „ქართული ოცნების“გენერალური მდივანი, თბილისის მერი, კახა კალაძე ჟურნალისტებთან საუბრისას “დეოლიგარქიზაციის“ შესახებ ევროკომისიის მოწოდებას.

კალაძის განცხადებით, საქართველოს ყოფილი პრემიერ-მინისტრი, ბიძინა ივანიშვილი არის მეცენატი, ქველმოქმედი.

„ბიძინა ივანიშვილი არის ადამიანი, რომელმაც მოახერხა და შეძლო სისხლიანი რეჟიმი, ქვეყნის მტრები, ანტისახელმწიფოებრივად მოაზროვნე ადამიანები მოეშორებინა ქვეყნის მმართველობიდან“,- განაცხადა კალაძემ.