პატიმრობაში მყოფი კრემლის კრიტიკოსი ალექსეი ნავალნი „კორუმპირებული პუტინის ელიტის“ წინააღმდეგ, რომელიც უკრაინის ომის ფონზე „კომფორტული“ ცხოვრებით ცხოვრობს, სანქციების დაწესების მოწოდებით გამოდის.

„ინსტაგრამზე“ გამოქვეყნებულ განცხადებაში, ნავალნი აღნიშნავს, რომ მეტი სანქციებია საჭირო კრემლის რეჟიმის ბენეფიციარებისთვის, რათა აიძულონ ისინი „არჩევანი გააკეთონ“.

„მე მოვიხდი ჩემს სასჯელს. მე არ ვარ პირველი და არ ვიქნები უკანასკნელი. თქვენ უნდა გადაიხადოთ ფასი სიმართლისა და დამოუკიდებლობისთვის, მე კი ჩემსას ვიხდი. ჩემთვის სხვებზე უარესი არ არის, ბომბები არ მეცემა თავზე", - განაცხადა ნავალნიმ.

ამასთან, კრემლის კრიტიკოსმა დასძინა, რომ „ფორბსის“ სიაში მყოფი პუტინის 200 ოლიგარქიდან ამ დროისთვის მხოლოდ 46 მათგანია სანქცირებული. ოპოზიციონერმა პოლიტიკოსმა ასევე აღნიშნა, რომ რუსი პროპაგანდისტები, რომლებიც მკვლელობების მოწოდებით გამოდიან, უქმეებზე ბერლინში მოგზაურობენ.

„ეს სიტუაცია სრულიად კომფორტულია პუტინის ელიტისთვის - იმ რამდენიმე ათასი ოჯახისთვის, რომელთა კეთილდღეობისთვის არსებობს ეს რეჟიმი. ვისთვისაც პუტინი ომს აწარმოებს", - დასძინა ნავალნიმ.