ატომური ენერგიის საერთაშორისო სააგენტოს (IAEA) ხელმძღვანელმა რაფაელ გროსიმ რუსეთს მის მიერ ოკუპირებული ზაპოროჟიეს ატომური ელექტროსადგურის გენერალური დირექტორის, იგორ მურაშოვის გათავისუფლებისკენ მოუწოდა.

გროსი იმედოვნებს, რომ მურაშოვი ოჯახს "უსაფრთხოდ და დაუყოვნებლივ დაუბრუნდება და შეძლებს ბირთვულ ობიექტზე მნიშვნელოვანი ფუნქციების აღდგენას".

რუსმა პატრულმა მურაშოვი პარასკევს დააკავა.

ატომური ენერგიის საერთაშორისო სააგენტომ განაცხადა, რომ რუსეთის მიერ მურაშოვის დაკავება საფრთხეს უქმნის ობიექტზე ბირთვულ უსაფრთხოებას.

როგორც დასავლური მედია წერს, მოსალოდნელია, რომ გროსი მომავალ კვირას მოსკოვსა და კიევში მოლაპარაკებებს გამართავს ელექტროსადგურის ირგვლივ დაცვის ზონის შექმნის შესახებ.