ფრაქცია "ნაციონალური მოძრაობის" თავმჯდომარის, ხატია დეკანოიძის განცხადებით, "მთავარი არხის" დამფუძნებელი, ნიკა გვარამია პრეზიდენტ სალომე ზურაბიშვილისგან შეწყალებას არ ითხოვს.
როგორც მან ჟურნალისტებს განუცხადა, ეს არის ნიკა გვარამიას მეგობრების და იმ პოლიტიკოსების გადაწყვეტილება, ვინც ფიქრობს, რომ მისი თავისუფლება საქართველოს ევროპულ გზაზე სჭირდება.
"ძალიან კონკრეტულად მინდა ვუთხრა ყველა იმ ადამიანს, ვინც ფიქრობს, რომ ნიკა გვარამიას გადაწყვეტილება იყო შეწყალება. ნიკა გვარამია შეწყალებას არ ითხოვს, არც არასდროს მოითხოვს. არასდროს მოუთხოვია არც მას, არც მის უფლებადამცველებს და არც ოჯახის წევრებს, ეს იყო ჩვენი, მისი მეგობრების და იმ პოლიტიკოსების გადაწყვეტილება, ვინც ვფიქრობთ, რომ საქართველოს ევროპული ინტეგრაციისთვის უნდა გაკეთდეს ყველაფერი, მათ შორის უნდა ყოფილიყო მიმართვა საქართველოს პრეზიდენტის სახელზე. ეს მიმართვა გულისხმობდა ზუსტად იმას, რომ მან საკუთარი პასუხისმგებლობა აიღოს 12 პუნქტის შესრულების კუთხით. რას გადაწყვეტს და როგორ პოზიციაზე დარჩება პრეზიდენტი, მისი საქმეა, ყველაფერი გასაგები იქნება, მაგრამ ნიკა გვარამიას დასამტკიცებელი არაფერი აქვს. ყველა იმ ადამიანის გასაგონად მინდა ვთქვა, ვინც ფიქრობს, რომ ნიკამ გარკვეულწილად კიდევ უნდა დაამტკიცოს საკუთარი ღირსება, არა! ნიკამ ეს არაერთხელ დაამტკიცა. ყველაზე მნიშვნელოვანი არის ის, რომ მისი თავისუფლება სჭირდება ახლა ქვეყანას და ევროპულ ინტეგრაციას. ამიტომ, ყველას ვთხოვ, განსაკუთრებით ამ ნაწილს ჩაუღრმავდნენ", - განაცხადა დეკანოიძემ.
მისი თქმით, საქართველოს პრეზიდენტის ადმინისტრაციის მხრიდან ჯერჯერობით, ამ საკითხზე გამოხმაურება არ ყოფილა.