საბა ბუაძე მიიჩნევს, რომ ხელისუფლებას ღირსების შემლახველი დამოკიდებულება აქვს ექსპრეზიდენტ მიხეილ სააკაშვილის მიმართ
თბილისის საკრებულოში პარტია „ლელოს" წევრი, საბა ბუაძე მიიჩნევს, რომ ხელისუფლებას ღირსების შემლახველი დამოკიდებულება აქვს ექსპრეზიდენტ მიხეილ სააკაშვილის მიმართ. როგორც მან ჟურნალისტებს განუცხადა, ამ საკითხზე სპეკულირების დასასრულებლად მიხეილ სააკაშვილი სამკურნალოდ საზღვარგარეთ უნდა გადაიყვანონ.
„ის, რომ მიხეილ სააკაშვილის საკითხი პოლიტიკური დღის წესრიგის ერთ-ერთი მთავარი საკითხი იყოს, პირდაპირ ამ ხელისუფლების ინტერესებშია, ზუსტად ამის გამოძახილია ის ქცევა და ღირსების შემლახავი დამოკიდებულება, რომელსაც მასთან დაკავშირებით ვხედავთ. ჩვენი პოზიცია არაერთხელ დაგვიფიქსირებია. მიგვაჩნია, რომ ამ საკითხით სპეკულირებისთვის წერტილის დასასმელად უნდა მოხდეს მისი სამკურნალოდ საზღვარგარეთ გადაყვანა. ეს საბოლოოდ დაასრულებს ყველანაირ სპეკულაციას და ამ ხელისუფლების ინტერესის სასარგებლოდ საკითხის გამოყენებას",-განაცხადა ბუაძემ.
რაც შეეხება საკრებულოს სხდომაზე გაჟღერებულ რეპლიკებს, მან აღნიშნა, რომ ვინც არ უნდა იყოს პატიმარი და რა ბრალიც არ უნდა ჰქონდეს წარდგენილი, არსებობს ელემენტარული ადამიანის ღირსებასთან დაკავშირებული საკითხები.
„ცხადია, ასეთი გამონათქვამები პატიმრობაში მყოფი ადამიანის მისამართით არის მიუღებელი. ეს ამ გამონათქვამების ავტორებზე უფრო მეტს ამბობს, ვიდრე ადრესატზე",-განაცხადა ბუაძემ.
v-if="article.gallery" v-html="article.gallery"
