ქვემო ქართლის რეგიონში, ბოლნისის მუნიციპალიტეტის მერიაში ტერიტორიული რეზერვის შესახებ საინფორმაციო შეხვედრა გაიმართა

საქართველოს ეროვნული გვარდიის, მე-20 ტერიტორიული თავდაცვის ბრიგადის, 204-ე ტერიტორიული თავდაცვის ბატალიონის ვიცე-პოლკოვნიკმა, მირზა ბეჟანიძემ, ეროვნული გვარდიის წარმომადგენლებთან ერთად, ბოლნისის მუნიციპალიტეტის მერიაში, ტერიტორიული რეზერვის შესახებ საინფორმაციო შეხვედრა გამართა. ინფორმაციას ბოლნისის მუნიციპალიტეტის მერია ავრცელებს.

მათივე ცნობით, შეხვედრას ბოლნისის მერი დავით შერაზადიშვილი, ბოლნისის საკრებულოს თავმჯდომარე თამაზ ჟორჟოლიანი, ადგილობრივი თვითმმართველობის წარმომადგენლებთან და მოქალაქეებთან ერთად დაესწრო.

„ვიცე-პოლკოვნიკმა საჯარო მოხელეებსა და მოქალაქეებს ტერიტორიული რეზერვის შესახებ დეტალური ინფორმაცია მიაწოდა და მათ დასმულ შეკითხვებს უპასუხა.

ტერიტორიულ რეზერვში ჩარიცხული რეზერვისტების წლიური ანაზღაურება 4200 ლარია. ასევე ისინი მოქმედი სამხედრო მოსამსახურეების მსგავსად, ჯანმრთელობის დაზღვევის სრული პაკეტით ისარგებლებენ.

ტერიტორიულ რეზერვში ჩასარიცხად რეგისტრაციის გავლა შეუძლიათ საქართველოს მოქალაქეობის მქონე პირებს 18-დან 51 წლის ჩათვლით, მათ შორის სტუდენტებს 18-დან 22 წლის ჩათვლით. ტერიტორიულ რეზერვში ჩარიცხულ მოქალაქეებს 4-წლიანი კონტრაქტი გაუფორმდებათ და საშუალება ექნებათ, სოციალური და სამართლებრივი დაცვით ისარგებლონ.

მოქალაქეები 45 დღიან ინტენსიურ საბრძოლო მომზადებას გაივლიან, რომელიც 12 თვეზე (თვეში ერთი შაბათ-კვირა) თანაბრად გადანაწილდება. ისინი რეზერვში სამსახურის დროს რეალურ საბრძოლო უნარებს შეიძენენ. სტუდენტებს სარეზერვო სამსახურის ერთი კონტრაქტის დასრულების შემდეგ, სამხედრო სავალდებულო სამსახური გავლილად ჩაეთვლებათ.

საბუთების მიღება ორშაბათიდან ხუთშაბათის ჩათვლით, 10:00 საათიდან 16:00 საათამდე, ხოლო პარასკევს, 10:00 საათიდან 12:00 საათამდე მიმდინარეობს.

რეგისტრაციის გავლა შესაძლებელია ონლაინ შემდეგ მისამართზე: onlinebct.mod.gov.ge,“ - აღნიშნულია ინფორმაციაში.