ხათუნა სამნიძე - პოლიციამ არაფერი გააკეთა იმისთვის, რომ ევროკავშირის დროშა ძალადობრივი მეთოდებით არ ჩამოეგლიჯათ

მაინტერესებს, როგორ არის ჩახრახნილი ჯვრის ფორმის რკინის კონსტრუქცია პარლამენტის შენობის წინ, მე რომ ჯებირს მივუახლოვდე, რამდენიმე პოლიციელი აუცილებლად მოვა და შემაკავებს - ამჯერად პოლიციამ არაფერი გააკეთა იმისთვის, რომ ევროკავშირის დროშა ასეთი ძალადობრივი მეთოდებით არ ჩამოეგლიჯათ, - ეს განცხადება ჟურნალისტებთან პარლამენტის ოპოზიციონერმა დეპუტატმა ხათუნა სამნიძემ გააკეთა.

სამნიძე დარწმუნებულია, რომ ძალადობრივ ჯგუფებს საქართველოში "ქართული ოცნება" ახალისებს.

“ძალიან სამწუხაროა შალვა პაპუაშვილის განცხადება, რომელიც მშვიდობიან მომიტინგეებსა და იმ ჯგუფებს შორის, რომლებიც ქვეყნის ევროპულ კურსს ღიად ესხმიან თავს და კონსტიტუციის წინააღმდეგ მიდიან, ტოლობის ნიშანს სვამს.

სამწუხაროა, როცა პაპუაშვილი დროშის გულში ფრიალზე საუბრობს, როდესაც პოლიტიკოსები კონკრეტული ნაბიჯებით და პოლიტიკური გადაწყვეტილებებით ფასდებიან, რაც არც პირადად მისი და არც “ქართული ოცნების“ მხრიდან არ ჩანს“, - განაცხადა ხათუნა სამნიძემ.

სამნიძე მმართველ გუნდს მიმართავს, ახალგაზრდების შეურაცხყოფას თავი დაანებონ. მისი თქმით, მიტინგზე მდგომმა ახალგაზრდებმა ძალიან კარგად იცოდნენ, თუ რა შინაარსის კანონს იღებდა საპარლამენტო უმრავლესობა და რა კანონის წინააღმდეგ მართავდნენ აქციას.

“დღეების მანძილზე ამ ადამიანებს შეეძლოთ “გუგლის“ გამოყენება, კანონპროექტის წაკითხვა და მისი სხვა კანონთან შედარება - შეეშვან ამ ადამიანების შეურაცხყოფას. იქ იდგნენ ინფორმირებული ადამიანები, რომელმაც გააკეთეს არჩევანი და "ქართული ოცნება" გააფრთხილეს, რომ ქვეყნის ევროპული მომავლის წინააღმდეგ ნაბიჯი არ გადადგან“, - განაცხადა სამნიძემ.