გიორგი ამილახვარი არის ადამიანი, რომელმაც მთელი თავისი პროფესიული კარიერა განათლების სისტემას მიუძღვნა და ამ მხრივ უდიდესი გამოცილება აქვს, - ამის შესახებ პარლამენტის თავმჯდომარე შალვა პაპუაშვილმა ჟურნალისტებს განუცხადა, რითაც უპასუხა კითხვას დეპუტატ გიორგი ამილახვართან დაკავშირებით, რომელიც, სავარაუდოდ, განათლების მინისტრად დაინიშნება.

პაპუაშვილის შეფასებით, ამილახვარი არა მხოლოდ მმართველ გუნდში, არამედ პარლამენტშიც, განათლების სფეროს მიმართულებით განსაკუთრებული კომპეტენციის მქონე ადამიანია.

„გუნდში ის [გიორგი ამილახვარი] არის მთავარი ადამიანი, ვინც სწორედ განათლების საკითხებთან დაკავშირებითაა კომპეტენტური. არა მხოლოდ გუნდში, არამედ პარლამენტშიც ამ მხრივ განსაკუთრებული კომპეტენციის მქონე ადამიანია“,- განაცხადა შალვა პაპუაშვილმა.

ცნობისთვის, პრემიერ-მინისტრი ირაკლი ღარიბაშვილი საქართველოს განათლებისა და მეცნიერების ახალ მინისტრს დღეს წარადგენს.

არსებული ინფორმაციით, განათლების მინისტრის პოსტზე მიხეილ ჩხენკელს დეპუტატი გიორგი ამილახვარი შეცვლის.