შალვა პაპუაშვილი - მიხეილ სააკაშვილის მდგომარეობა მხოლოდ მისი ქცევითაა გამოწვეული - მნიშვნელოვანია, რომ ყველამ, მათ შორის პარტნიორებმა სააკაშვილს მოუწოდონ, რომ საპატიმრო პირობებს შეეგუოს და სასჯელი ღირსეულად მოიხადოს
პარლამენტის თავმჯდომარის, შალვა პაპუაშვილის განცხადებით, მიხეილ სააკაშვილის ჯანმრთელობასთან დაკავშირებით ადამიანის უფლებათა ევროპული სასამართლოს დასკვნით დასტურდება, რომ მესამე პრეზიდენტის მდგომარეობის გამომწვევი მიზეზი მისივე ქცევაა.
როგორც შალვა პაპუაშვილმა ჟურნალისტებთან აღნიშნა, ყველამ, მათ შორის, საერთაშორისო პარტნიორებმა, მიხეილ სააკაშვილს უნდა მოუწოდონ, რომ სასჯელაღსრულების პირობებს შეეგუოს და სასჯელი ღირსეულად მოიხადოს.
„იცით, რომ თავის დროზე მიხეილ სააკაშვილის ჯანმრთელობის მდგომარეობა ევროკავშირის წევრი ქვეყნების დემარშის საფუძველი გახდა. ელჩები იუსტიციის მინისტრთან მივიდნენ ამ თემის გამო, თუმცა ამ დემარშს ადამიანის უფლებათა ევროპულმა სასამართლომ გასცა პასუხი. მიხეილ სააკაშვილს სამედიცინო დახმარების მიღების თვალსაზრისით არანაირი შეზღუდვა არ აქვს. მას ყველა სათანადო სერვისი და მომსახურება მიეწოდება. ამით დასტურდება ისიც, რომ ის მდგომარეობა, რაზეც ის და მისი ახლობლები საუბრობენ, მხოლოდ მისი ქცევითაა გამოწვეული. მნიშვნელოვანია ერთი რამ, რომ ნაცვლად თვითდაზიანების წახალისებისა, ყველამ, მათ შორის, საერთაშორისო პარტნიორებმა მოუწოდონ მიხეილ სააკაშვილს, რომ სასჯელაღსრულების პირობებს შეეგუოს და სასჯელი ღირსეულად მოიხადოს“, - აღნიშნა პაპუაშვილმა.
