ვეტოს დადება ყველა ჯერზე დაკავშირებული იყო ინსტიტუტების დამოუკიდებლობის დაცვასთან - ინსტიტუტების დამოუკიდებლობა არის გასაფრთხილებელი ყველასგან, - ამის შესახებ პრეზიდენტმა სალომე ზურაბიშვილმა მედიასთან შეხვედრისას განაცხადა. ამასთან ზურაბიშვილმა აღნიშნა, რომ შეფერხება ეროვნულ ბანკში რაზეც იყო საუბარი, არ ყოფილა.

„რაც ეხება ვეტოებს, დაითვალეთ რამდენი კანონი იქნა მიღებული და რამდენჯერ გამოვიყენე, სამჯერ გამოვიყენე, ერთი იყო ის „რუსული კანონი“, რომელიც არ მივიდა ბოლომდე, სამივეჯერ ეს არის ინსტიტუტების დამოუკიდებლობის დაცვასთან დაკავშირებული. ეს არის ჩვენი ეროვნული ბანკის დამოუკიდებლობა, რომელიც ქვეყნის რეპუტაციისთვის უმნიშვნელოვანესია და ორი კანდიდატი ახლა კი არ ჩამიგდეს, ორი ჩააგდეს მანამდე, გაწერეს ისე, რომ შეუძლებელი გახდა... მერე ამბობენ, რომ თუ არ დანიშნე ბორდში, თურმე ეს ხელს უშლის ამ ორგანოს მუშაობას, როცა მშვენივრად მუშაობდა, არ აკლდა არავინ ბორდში, რომელსაც სხვათა შორის, არ აქვს ძალიან დიდი როლი, სამწუხაროდ და გასაძლიერებელია, იყო მოვალეობის შემსრულებელი სრულიად პასუხისმგებელი, პროფესიონალი და ყველასთვის მისაღები ადამიანი. ასე რომ, არავითარი შეფერხება ამით არ ყოფილა. იყო მცდელობა, რომ ხაზი გამესვა იმაზე, რომ არ შეიძლება შენ „მაწვებოდე“ იმისთვის, რომ მხოლოდ ერთი ადამიანია, რომელიც უნდა დანიშნო და თუ არ დანიშნავ, მაშინ ეს ხდება მიუღებელი. არ შეიძლება, ჩვენი ინსტიტუტების დამოუკიდებლობაა ის, რაც რჩება, იგივე ეხება ცესკოს თავმჯდომარეობას, ინსტიტუტების დამოუკიდებლობა არის გასაფრთხილებელი ყველასგან, გავუფრთხილდეთ, ეს არის ჩემი გზავნილი”, - განაცხადა პრეზიდენტმა.