მექსიკაში მიგრანტების ავტობუსი ხევში გადავარდა, დაიღუპა მინიმუმ 18 ადამიანი

მექსიკაში ავტობუსი, რომელსაც უცხოელი მიგრანტები გადაჰყავდა, ხევში გადავარდა, რის შედეგადაც 18 ადამიანი დაიღუპა.

მედიის ინფორმაციით, დაღუპულთა შორის სამი არასრულწლოვანია. დაშავებულია სულ მცირე 23 ადამიანი, რომლებიც საავადმყოფოში მკურნალობენ.

ავტობუსი მეხიკოდან ჩრდილოეთ სასაზღვრო ქალაქ ტიხუანასკენ მიემართებოდა და მასში, დაახლოებით, 42 მგზავრი იმყოფებოდა, მათ შორის მოქალაქეები ინდოეთიდან, დომინიკის რესპუბლიკიდან და აფრიკის ზოგიერთი ქვეყნიდან.

ოფიციალური პირების ცნობით, ზოგიერთი მგზავრი შეერთებული შტატების საზღვრისკენ მიემართებოდა.

მექსიკაში მსგავსი ავტოსაგზაო შემთხვევები ხშირად ხდება, რასაც აშშ-სკენ სახიფათო გზით მიმავალი ბევრი მიგრანტის სიცოცხლე ეწირება.