საფრანგეთის პრეზიდენტმა, ემანუელ მაკრონმა ისრაელის პრემიერ-მინისტრ ბენიამინ ნეთანიაჰუსთან სატელეფონო საუბრისას განაცხადა, რომ, ღაზაში ომი უნდა დასრულდეს და მძევლები უნდა გათავისუფლდნენ.

„ღაზაში პალესტინელების განსაცდელი უნდა დასრულდეს“, - აღნიშნა მაკრონმა.

მან ასევე გამოხატა მხარდაჭერა ჯო ბაიდენის ცეცხლის შეწყვეტის გეგმის მიმართ.

საფრანგეთის ლიდერის განცხადებით, ცეცხლის შეწყვეტის შესახებ შეთანხმების მიღწევა უნდა მოხდეს, რათა გაიხსნას სანდო პერსპექტივა კონფლიქტის ორი სახელმწიფოს პრინციპზე დაფუძნებული გადაწყვეტისთვის და ღაზის სექტორის სამართავად რეფორმირებული და გაძლიერებული პალესტინის ხელისუფლების შექმნისთვის.