პარტნიორებთან ეს აგდებული დამოკიდებულება უნდა დასრულდეს - პატარა ბავშვები არიან, რომ მოგყავს და ატყუებ, რომ [9 ნაბიჯი] შესრულებულია? ან არ რცხვენია იმ საგარეო საქმეთა მინისტრს? - ამის შესახებ პლატფორმა „ერთიანობის“ ლიდერმა, „სტრატეგია აღმაშენებლის“ თავმჯდომარემ, გიორგი ვაშაძემ განაცხადა, რითაც საგარეო საქმეთა სამინისტროში გუშინ გამართულ შეხვედრას გამოეხმაურა.

მისივე თქმით, ევროკავშირის პოზიცია ძალიან მკაფიოა და ძალიან სამწუხაროა, რომ საქართველოს ევროინტეგრაციის პროცესი შეჩერებულია.

„საქართველოს ევროინტეგრაციის პროცესი შეჩერებულია „ქართული ოცნების“ ხელისუფლებაში ყოფნის ვადით. ჩვენ ვხედავთ, რომ ეს უკუღმართი ადამიანები არაფრის გასწორებას არ აპირებენ, ამიტომ 26 ოქტომბერს უნდა დავასრულოთ დაპირისპირება, გაიმარჯვოს ერთიანობის იდეამ, წავიდეთ სწრაფად ერთიანობის იდეისკენ და ეს აგდებული დამოკიდებულება, არასწორი მიდგომა პარტნიორებთან უნდა დასრულდეს. პატარა ბავშვები არიან, რომ მოგყავს და ატყუებ, რომ შესრულებულია? რა არის შესრულებული? ან არ რცხვენია იმ საგარეო საქმეთა მინისტრს? მე არ მგონია, რომ ასეთი პრეცედენტი სადმე მსოფლიოში არსებობდეს. ამიტომ ჩვენ 26 ოქტომბერს ეს უკუღმართი ვითარება უნდა შევცვალოთ,“ - განაცხადა ვაშაძემ.

ცნობისთვის, გუშინ, საგარეო საქმეთა სამინისტროში ევროკავშირის წევრი ქვეყნებისა და პარტნიორი სახელმწიფოების საელჩოების წარმომადგენლებთან შეხვედრა გაიმართა. უწყების ცნობით, შეხვედრა ევროკავშირში გაწევრიანებასთან დაკავშირებით საქართველოსთვის განსაზღვრული 9 ნაბიჯის შესრულების თაობაზე გაიმართა.