ისრაელის პრემიერ-მინისტრი, ბენიამინ ნეთანიაჰუ გაერო-ს გენერალურ მდივანს, ანტონიო გუტერეშს მიმართავს და მოუწოდებს, ლიბანში გაერო-ს დროებითი ძალების ( UNIFIL) ჯარისკაცები საბრძოლო მოქმედებების ადგილებიდან გაიყვანოს.

„ბატონო გენერალურო მდივანო, გაარიდეთ UNIFIL-ის ძალები საფრთხის ზონას. ეს უნდა გაკეთდეს ახლავე და დაუყოვნებლივ. უარი UNIFIL-ის ჯარისკაცების ევაკუაციაზე მათ „ჰეზბოლას“ მძევლებად აქცევს. ეს საფრთხეს უქმნის როგორც მათი, ასევე ჩვენი ჯარისკაცების სიცოცხლეს. ვწუხვართ, UNIFIL-ის ჯარისკაცების დაშავების გამო და ყველაფერს ვაკეთებთ, რომ ისინი არ დაშავდნენ, მაგრამ ამის უზრუნველსაყოფად მარტივი და აშკარა გზა არის უბრალოდ მათი საფრთხის ზონიდან გაყვანა“, - აცხადებს ნეთანიაჰუ ანტონიო გუტერეშისათვის გაგზავნილ მიმართვაში.

მისი თქმით, ევროპელმა ლიდერებმა უნდა გააკრიტიკონ არა ისრაელი, არამედ „ჰეზბოლა“, რომელიც გაერო-ს დროებით ძალებს ცოცხალ ფარად იყენებს.

შეგახსენებთ, გაერო-ს ინფორმაციით, ისრაელის საჰაერო თავდასხმებისას გაერო-ს სამშვიდობო მისიის ხუთი წევრი დაშავდა.