უკრაინის პრეზიდენტის, ვოლოდიმირ ზელენსკის განცხადებით, უკრაინა მის რომელიმე ოკუპირებულ ტერიტორიას იურიდიულად ვერასდროს აღიარებს რუსეთის ტერიტორიად. უკრაინის პრეზიდენტმა ამის შესახებ Fox News-თან ინტერვიუში განაცხადა, როდესაც უპასუხა შეკითხვას : მზად არის თუ არა სამშვიდობო შეთანხმების ფარგლებში ტერიტორიის ნაწილის დასათმობად.

„არ შეგვიძლია იურიდიულად ვაღიაროთ უკრაინის რომელიმე ოკუპირებული ტერიტორია, როგორც რუსული. ეს ეხება იმ ტერიტორიებს, რომელთა ოკუპაციაც პუტინმა 2014 წლიდან, უკრაინაში სრულმასშტაბიან შემოჭრამდე განახორციელა. ჩვენ ამას იურიდიულად არ ვაღიარებთ, ჩვენ ამას არ ვღებულობთ“, - აღნიშნა ზელენსკიმ.

მისი თქმით, უკრაინა მზადაა, ყირიმი დიპლომატიური გზით დაიბრუნოს.

„მზად ვართ, დიპლომატიური გზით დავიბრუნოთ ყირიმი. ვერ დავკარგავთ ათობით ათას ჩვენს ადამიანს, რომ ყირიმის დაბრუნების გამო დაიღუპონ. გვესმის, რომ ყირიმის დაბრუნება შესაძლებელია დიპლომატიური გზით”, - აღნიშნა ზელენსკიმ.