ლიეტუვის საგარეო საქმეთა მინისტრი, კესტუტის ბუდრისი რუსეთის ფედერაციის მიერ კიევსა და ოდესაზე განხორციელებულ საჰაერო თავდასხმას ეხმაურება და აცხადებს, რომ რუსეთის პრეზიდენტი, ვლადიმერ პუტინი და მისი იმპერიული ამბიციები მშვიდობის უდიდეს დაბრკოლებად რჩება.

„წუხელ რუსეთმა კიდევ ერთხელ განახორციელა ტერორი უკრაინაზე, კიევსა და ოდესაზე დრონებისა და რაკეტების ტალღების გაშვებით. დაბომბეს სამშობიარო განყოფილება და საცხოვრებელი შენობები. დაიღუპნენ და დაიჭრნენ მშვიდობიანი მოქალაქეები. პუტინი და მისი იმპერიული ამბიციები მშვიდობის უდიდეს დაბრკოლებად რჩება. ის ომის დასრულებას არ ცდილობს - ის მხოლოდ მეტ სიკვდილს და ნგრევას ცდილობს“, - წერს ლიეტუვის საგარეო საქმეთა მინისტრი სოციალურ პლატფორმა Xhttps://x.com/BudrysKestutis-ზე.

კესტუტის ბუდრისი, უკრაინელ კოლეგა ანდრეი სიბიგასთან ერთად, დღეს ხერსონს და მიკოლაივს ეწვია.

„განადგურება, დანგრეული ქალაქები, სკოლები, საავადმყოფოები და დანგრეული ცხოვრება. ძლიერი დაბომბვა და დრონებისთთავდასხმები - ასობით დაღუპული და დაშავებული ადამიანი. ეს არის რეალობა, რომლითაც დღეს ხერსონის მოსახლეობა ცხოვრობს. ჩემს კოლეგასთან და მეგობართან, ანდრეი სიბიგასთან ერთად მიკოლაივისა და ხერსონის რაიონებს ვეწვიე. ყველგან, სადაც წავედით - ვნახეთ არაადამიანური სისასტიკე და რუსული აგრესიის დანაშაულები და ეს ხდება XXI საუკუნეში“, - წერს ლიეტუვის საგარეო მინისტრი სოციალურ ქსელში.

მისი თქმით, კაცობრიობის წინააღმდეგ ჩადენილი დანაშაულებისთვის ყველა დამნაშავემ პასუხი უნდა აგოს და მართლმსაჯულების წინაშე წარსდგეს.

„დაუსჯელობა მხოლოდ მეტ აგრესიასა და სისასტიკეს იწვევს“, - აღნიშნა კესტუტის ბუდრისმა.