სასჯელაღსრულებისა და პრობაციის მინისტრმა კახა კახიშვილმა ქალაქ ნიცაში მომხდარ ტერორისტულ აქტთან დაკავშირებით, საქართველოში საფრანგეთის ელჩს სამძიმრის წერილი გაუგზავნა.

”შოკირებული ვართ ნიცაში დატრიალებული საშინელი ტრაგედიით. ვგმობთ ამ ბარბაროსულ ტერორისტულ აქტს, ვიზიარებთ დიდ გულისტკივილს და თანავუგრძნობთ ფრანგ ხალხსა და საფრანგეთის ხელისუფლებას“, - აღნიშნავს მინისტრი სამძიმრის წერილში.

ბოლო მონაცემებით, ნიცაში თავდასხმის შედეგად დაღუპულთა რაოდენობა 84-მდე გაიზარდა. გუშინ, ადგილობრივი დროით 23:00-ზე ნიცაში, სადაც მოსახლეობა ეროვნულ დღესასწაულს, ბასტილიის აღების დღეს აღნიშნავდა, ხალხში სატვირთო ავტომობილი შევარდა და უამრავი ადამიანი გადასრისა, რის შემდეგაც იქ მყოფებს ცეცხლი გაუხსნა. ადგილზე მისულმა სამართალდამცველებმა თავდასხმელის ლიკვიდაცია მოახდინეს. პასუხისმგებლობა თავდასხმისთვის ჯერჯერობით არც ერთ დაჯგუფებას არ აუღია.