11 მარტს, ბათუმში, პლაზას მიმდებარე ტერიტორიაზე დაკავებული ჯიმი ვარშანიძისა და რამაზ ხიმშიაშვილის სასამართლო პროცესი გადაიდო. მოსამართლე გოჩა ფუტკარაძემ საკითხზე საბოლოო გადაწყვეტილების გამოსაცხადებლად მორიგი სხდომა ხვალ, 17:30 საათზე დანიშნა.

"მანქანა პლაზას მიმდებარე ტერიტორიაზე დავაყენე, ავარიული ჩართული მქონდა და აფთიაქში შევდიოდი წამლის საყიდლად. კიბეებზე, რომ ავდიოდი პატრულის თანამშრომელმა დამიძახა, რომ მანქანა გადაიყვანეო. გამყავდა მანქანა, მაგრამ დაიწყო ჯარიმის დაწერა, ვუთხარი, რომ მამაჩემი ცუდად არის და წამალი უნდა შევიძინო. პოლიციელმა მითხრა, არ მაინტერესებსო და საბუთები გამომართვა. ვუთხარი მამა ცუდად არის, ჩქარა დაწერე ჯარიმა, რომ გადავიდე-მეთქი და ავღელდი. პატრულმა მითხრა - „არ მაინტერესებს, ფეხებზე მკიდია შენი მდგომარეობაო“. აღნიშნული პატრულის სახელი გვარია არჩილ ხაბაზი. მამაჩემი ცუდად იყო და რომ დამაკავეს, ხალხიც შეიკრიბა მხარდასაჭერად",- აცხადებს ჯიმი ვარშანიძე.

დღეს ბათუმის საქალაქო სასამართლოში, იმ პირების სასამართლო პროცესი გაიმართა, რომელთა დაკავებასაც 11 მარტს საპროტესტო აქცია მოჰყვა.