ბათუმის მოვლენებთან დაკავშირებით დაკავებული მერაბ ღოღობერიძისა და ირაკლი ჩხვირკიას ადვოკატები ბათუმის საქალაქო სასამართლოს გადაწყვეტილებას გაასაჩივრებენ.

როგორც ირაკლი ჩხვირკიას ადვოკატმა დავით ჩავლეიშვილმა გუშინდელი პროცესის დასრულების შემდეგ ჟურნალისტებს განუცხადა, მოსამართლე ვიოლეტა ფორჩხიძემ გადაწყვეტილება პოლიტიკური ზეწოლის შედეგად მიიღო. მისივე თქმით, დაკავებულებს ბათუმის მოვლენების ორგანიზებასთან კავშირი არ აქვთ.

11-12 მარტს აჭარის პოლიციის მთავარ სამმართველოსთან მომხდარის გამო სისხლის სამართლის ბრალდებით დაკავებულ ორ პირს, მერაბ ღოღობერიძეს და ირაკლი ჩხვირკიას ბათუმის საქალაქო სასამართლომ აღკვეთის ღონისიების სახით წინასწარი პატიმრობა შეუფარდა. მოსამართლე ვიოლეტა ფორჩხიძემ არ დააკმაყოფილა ადვოკატების შუამდგომლობა, რომლებიც აღკვეთის ღონისძიების სახით გირაოს შეფარდებას ითხოვდნენ. მოსამართლის გადაწყვეტილებით, მორიგი პროცესი 20 ივნისს, 12:00 საათზე ჩაინიშნა.

საქართველოს შინაგან საქმეთა სამინისტროს ინფორმაციით, ბათუმის საქალაქო სასამართლოს განჩინების საფუძველზე, აჭარის პოლიციის დეპარტამენტის დეტექტივების სამმართველოს თანამშრომლებმა, ჯგუფური დანაშაულის ორგანიზების და ხელმძღვანელობის ბრალდებით ორი პირი - 1985 წელს დაბადებული მ.ღ. და 1987 წელს დაბადებული ი.ჩ. დააკავეს. მათივე ცნობით, აღნიშნული პირები დაკავებულები არიან სსკ-ის 225-ე მუხლის პირველი ნაწილით, რაც გულისხმობს ჯგუფური მოქმედების ორგანიზებას ან ხელმძღვანელობას, რასაც თან ახლავს ძალადობა, რბევა, სხვისი ნივთის დაზიანება ან განადგურება, იარაღის გამოყენება, იარაღის გამოყენებით ხელისუფლების წარმომადგენლისადმი წინააღმდეგობა ან/და მათზე თავდასხმა.

იხილეთ ვიდეო: ხმაური სასამართლოში, როცა ბათუმის არეულობაში ბრალდებულებს წინასწარი პატიმრობა შეუფარდეს